Palm Sunday (B)

DIOS KO! SA DIIN KA?

Mabudlay magtungkad sang kabubut-on sang Dios. Diin bala ang Dios sa kasakit ni Jesus? Kag diin man bala ang Dios sa aton kasakit? Kon kaisa, sa aton kaluya kag pag-antus, sa aton pagbatyag nga halos wala sing pulos ang aton mga paghimud-os, kita man nagasiling, “Dios ko, ngaa ginpatumbayaan mo ako?”
Kon si Jesus nga Anak sang Dios, kag ang Dios yara sa iya, ang dinalan sang pasyon suno kay San Markos nagapakita nga ang Dios nagapakilala sang Iya nga kaugalingon indi sa gahum kundi sa KALUYA! Kay Jesus, “gin-uba” sang Dios ang Iya pagka-Dios agud mabatyagan Niya ang aton pagkatawo. Ginpabay-an sang Amay nga Siya “mahuy-an” sa dili Niya pagsabat sang singgit ni Jesus. Ginhulat Niya nga matapos ang tanan, kag ginsabat Niya si Jesus paagi sa pagbanhaw sa Iya.
Sang makita sang Kapitan nga Romano kon paano napatay si Jesus, sia nagsiling: “Matuod gid nga ini nga tawo amo ang Anak sang Dios.” Para kay San Markos, kon kita nagatuo kay Jesus tungud kay Sia may gahum sa pagpangwali kag paghimo sang mga milagro, indi ini lubos nga pagtuo. Wala pa naton makilala si Jesus. Ginpamatud-an ni Jesus nga Sia matuod nga Anak sang Dios sa iya “kaluya” sa pagtuman sang buot sang Amay tubtob sa kamatyon sa Krus!
Ang Dios ni Jesus indi mahapos hangpon. Apang ini nga Dios kaupod naton sa aton kasakit, bisan pa kon kaisa indi naton mabatyagan ang Iya presensya. Kon ginhimaya Niya si Jesus, kita man, Iya paghimayaon!

FR. RONNIE



KRUS ET PAGPALANGGA

Si Maureena Fritz amo ong presidente et Bat Kol Institute nga akon gin-eskwelahan sa Jerusalem sang mga lima un ka tuig ong nagligad. Sya nagsugid nga sang una nga pag-abot nana sa Israel sang mga “70’s” agud sugdan ong Institute, nagbakal sia sa isa ka balaligyaan et ‘ice cream’. Apang sya nakibot ag nakum-an nga, sang hinali lang, may isa ka soltero nga Judeo nga naghablot et ana ginakulentas nga Krus. Abi nana kawatan dya, apang ong soltero owa tana nagdalagan kundi akig-akig nga NAGLAMPOS et Krus sa semento, nagdupla kara ag nagtinapaktapak et Krus. Dayon dya nagtulok et matalum sa ana nga nagapamangkut: “Sa diin kamo nga mga Kristiano sang ginapatay kami ni Hitler nga mga Judeo?”
Bisan kita manakara nagaselebrar et masinadyahon nga pagsulod ni Kristo sa Jerusalem, ong Ebanghelyo et Pasyon et aton Ginoo nagahatud gid kanaton sa Kalbaryo. Indi gid naton mapunggan nga mag-focus sa Krus. Ano bala ong aton pagtulok sa Krus? Isa man bala dya ka eskandaloso nga imahen pareho et pagkabig et soltero sa aton estorya?
Sa pagkamatuod, ong Krus isa ka makahaladluk o makangilidlis nga butang. Kay sa duro nga mga eskwelahan sa Germany, ong mga ginikanan et mga estudyante nagpamwersa nga bul-on ong mga nagakabit nga mga Krusipiyo sa mga ‘classrooms’ tungod siling nanda: “ong paglantaw et imahen et gin-torture nga tawo naga’traumatize’ sa amon mga kabataan”. Daw isa ka ginanggong nga panimuot! Kay aton gid nasaydan nga ong tawo nga daon sa Krus, daon dira, indi sa pagkugmat kanaton kundi sa pagpakita et ana wala’y tupong nga pagpalangga sa aton nga mga makasalala. Owa sya napatay sa Krus tungod et ana nga binuhatan kundi tungod et imo ag akon nga binuhatan. Imaw gid tani dya ong aton panumdoman samtang aton ginasaulog ong Semana Santa.
Mabuhay ong Maalwan nga mga Mambusaonon!
FR. DODO