7th Sunday in OrdinaryTime (B)

DIOS LANG ANG MAKAPATAWAD!

“Anak ko, napatawad na ang imo mga sala”. Ini nga mga pulong sang aton Ginuo, nagatagring sa dalunggan sang mga Manunudlo sang Kasuguan sa Iya nga panahon. Para sa ila isa ini ka daku nga sala sa Diyos, tungud, ang Diyos lang ang sarang makapatawad! Ginabase ini nga ideya nga ang “sakit” ukon ang “kasablagan” sang lawas sang tawo nagagikan sa iya pagkabuhi sa kasal-anan. Kag gani, ang sakit isa ka”silot” nga ginhatag sang Diyos sa tawo bilang kabayaran sa iya nga kasal-an, kag gani ang Dios lang lang ang sarang makahatag sang kapatawaran sa tawo nga nakasala!
Sa pihak nga bahin, kon kita ginapatawad sang Dios, indi naton makita ang “epekto” sini sa aton mga mata, tungud gani ang pagpatawad maeksperyensyahan lang naton sa aton pagtuo kag pagsalig. Gani ang resulta sang pagpatawad mas mangin hayag paagi sa mga bagay nga “makita” sang aton mga mata! Sa pag-ayo sang aton lawas, labi nga ginapakita ang gahum sang Dios nga Siya nagapatawad.
Amo ini ang sitwasyon sang aton Ginuo sa atubang sang mga “malisyoso” nga mga Manunudlo sang Kasuguan nga nagapangita lang sa padihot agud may i-akusar sila sa aton Ginuo nga kasal-anan.
Nahibaluan sang aton Ginuo ang ila nga panumduman, sa bagay nga sa sini gid nga tion, ginpahayag Niya ang gahum sang Diyos kag ang Iya PAGKA-DIOS paagi, indi lamang sa pagpatawad, kundi paagi man sa pag-ayo!
Sa kay Jesus, gina-uli ang kaangtanan sang isa ka tawo nga makasasala sa Diyos. Magpalapit kita sa Iya!

FR. RONNIE




PANGAGDA SA PAGPATAWAD

Sa Ebanghelyo, si Jesus nag-ayo et isa ka paralitiko paagi sa pagsiling nga: “Ginapatawad un ong imo mga sala!” Gani ong mga Manunudlo et Kasugoan nga daon didto nagprotesta sa ana ginhambal kay para kananda, owa et may makapatawad et sala kundi ong Dios lamang. Apang paagi sa pag-ayo ni Kristo sa paralitiko, ana ginapahayag nga ong gahum sa pagpatawad indi et ana lamang et Dios, kundi nga bisan ong isa ka tawo, may gahum man sa pagpatawad.
Huo, ong pagpatawad indi et ‘exclusibo’ nga kinamatarung et Dios kundi nga kita man may kinamatarung bilang ana mga unga. Kay sa pagkamatuod, indi bala nga kita ana ginmanduan nga magpatawad, indi lamang et makapito, kundi kapituan kapito? Gintudloan man kita nga magpangamuyo sa Dios “nga patawaron ong aton mga sala subong nga ginapatawad man naton ong mga nakasala kanaton”. Kita ginapahug pa gani sa pagpatawad et aton mga utod kay kon indi, indi man pagpatawaron ong aton mga sala. Buot silingon, si Kristo nagapangagda sa mga Manunudlo et Kasugoan nga mangin MAPINATAWARON, kasubong nga ana man ginawaragwag nga ong pagpatawad, ulobrahon ukon responsibilidad et tanan nga buot magsunod kanana.
Gani, aton buligan ong mga tawo sa ‘paghimos et anda banig ag sa pagpanaw’, sa pagkalipat ag pagbiya et anda mga sala, agud nga sanda magpadayon et anda kabuhi sa bag-o nga pagkabuhi. Ong Dios, sa oras nga tanan, nagabukas et pwertahan et pagpatawad para sa aton. Amo man on ong aton himuon sa isya ag isya.
Mabuhay ong Maalwan nga mga Mambusaonon!

FR. DODO