4th Sun in Ord. Time (B)

EXOUSIA

Ginapakita subong nga Dominggo ang ‘awtoridad kag gahum” sang aton Ginuong Jesukristo. Amo ini ang kahulugan sang griego nga tinaga nga “exousia”. Ini nga awtoridad makita sa Iya makatalanhaga nga mga pulong nga sa diin, bisan pa ang mga malain nga mga espiritu nagatuman sa Iya.
Ang awtoridad sang aton Ginuo wala nagahalin sa kayo sang Iya nga pagtulun-an subong maalamon nga “manunudlo”. Ini nagahalin sa Iya pulong nga nagahimo sang iya ginamando. “Ini nga tawo may gahum bisan pa sa pagsugo sang malaut nga espiritu, kag nagatuman sila sa Iya,” siling sang mga tawo sa daku nga pagkatingala. Ang pulong ni Jesus katulad sang pulong sang Dios nga nagatuga. Ang Dios nagsiling, “Magluntad ang kapawa!”- kag nagluntad gid ang kapawa (Gen. 1:3)
Ining pulong nagalugpay sa mga nabudlayan kag mga nagahinulsol, kag nagapuno sang kalag sing pagtuo, paglaum, kag paghigugma. Pulong ini nga “mapuslanon sa pagpanudlo, pagsabdong, pagtadlong, kag paghanas sa kamatuoran” (2 Tim 3:16). Pulong ini nga makapatubo sa mga tumuluo kag makahatag sang palanublion nga aton maambit sa tanan nga ginapakabalaan (Bin. 20:32).
Ang mga nakahibalo kon ano gid ang Kristianismo nagasiling nga kon nalugaw-an gid man ini, ini tungud kay wala pa ini gintilawan sa kabuhi. Ayhan mga Kristiano ukon Katoliko lang kita sa pulong, kag indi sa BUHAT! Ayhan wala pa gid kita nagkabuhi suno sa Pulong sang Diyos.
Magsugod kita sa pag-usisa sang aton kaugalingon sa iwag sang Pulong sang Dios. Ipahayag naton ini paagi sa aton kabuhi sang PAGPANIBAG-O!
FR. RONNIE



NAWONG SA NAWONG
Sa Israel, owa et may makatupong kay Moises bilang propeta ag manugtao et kasugoan. Apang si Moises mismo nagasiling nga ong Dios magapadala pa gid et isa ka propeta nga kaangay nana o LABAW pa kanana. Ag dya nga panagna natuman sa kay Kristo. Iba si Moises sa tanan nga mga pinuno et Israel, indi tungod kay duro nga mga milagro ong ana ginhimo ukon duro ong ana ginbatas sa pagtuytoy et Israel paadto sa Duta nga Ginsaad, kundi tungod kay sia nakighambal sa Dios et tampad – “nawong sa nawong”, pareho et paghambal et tawo sa isa ka abyan (Ex. 33:11).
Karon, ong katumanan et panagna tuhoy sa bag-o nga propeta makita lamang kay Jesus. Ag ong katumanan kara labaw pa sa ginlauman. Bisan nga madalum ong kaangtanan ni Moises sa Dios, owa tana sia gintugoti nga makita ong nawong et Dios, ong LIKOD lamang et Dios ong ana nakita (Ex. 33:23). Apang ong bag-o nga Moises – si Jesukristo – matuod nga nakakita gid ya sa Dios. Si Jesus nagakabuhi mismo sa atubangan et Dios, indi tana bilang isa ka abyan, kundi bilang Anak.
Sa Ebanghelyo manakara, aton nabatian ong PAGKATINGALA et mga tawo sa pagpanudlo ni Kristo nga may “exousia” ukon awtoridad. Indi lamang dya tungod kay manami sia magpamulong-pulong ukon may gahum ong ana mga pulong sa pagtabog et demonyo kundi nagahalin dya mismo sa ana Amay. Ong Pagtulun-an ni Kristo owa ginatudlo sa bulothoan; owa man dya nagahalin sa kaalam et tawo. Sa baylo, NAGAHALIN dya sa Amay, sa pagpakighambal ni Jesus sa Dios “nawong sa nawong”, sa ana pagpangamuyo bilang Anak.
Mabuhay ong Maalwan nga mga Mambusaonon!
FR. DODO