TRINITY SUNDAY (A)

DON’T BUG ME… HUG ME!

Ginapahayag subong sang aton nga Ebanghelyo ang KINATUHAY sang Diyos. Yara sa gihapon sa panghuna-huna sang kalabanan nga ang Diyos daw katulad sang isa ka “pulis” nga nagabantay lang sa tagsa naton ka sala, kag kon madakpan kita, iya kita ibutang sa bilanggu-an. May ara man nga nagapati nga ang Diyos daw katulad sang isa ka “hukom” nga nagahatag sang iya nga sintensya sa mga nakabuhat sang kalainan.
Apang sa aton nga Ebanghelyo subong, maathag nga ginpahayag ni San Juan nga ang Diyos “NAGHIGUGMA gid sa kalibutan sa bagay nga ginhatag Niya ang Iya bugtong nga Anak...wala Niya ginpadala ang Iya Anak sa paghukum sang kalibutan, kundi sa PAGLUWAS sang kalibutan.” Tungud sa paghigugma sang Amay sa Iya mga tinuga, Iya gintan-ay ang kaluwasan para sa TANAN paagi sa Iya Bugtong nga Anak, agud ang tagsa-tagsa may kahiga-yunan sa pagpanumbalik sa Iya nga sabak.
Luyag sang Amay nga kita mag-ambit sang Iya nga himaya sa bagay nga luyag Niya nga “hakson” ang tanan, ano man nga sahi kita sa aton pagkatawo. Diyos Siya nga nagahigugma kag indi Siya luyag nga kita “tabugon” sa Iya nga presensya. “He is a God who does not bug, but HUG”! Sa bagay nga bisan pa ini nagakahulugan nga Iya “i-sakripisyo” ang Iya bugtong nga Anak, agud lang nga “mahakus” liwat ang Iya mga tinuga, ginpadala Niya Siya sa aton tunga.
Sa baylo sini tanan, ang tawo nagapabilin nga “maluya” sa gihapon sa iya pagkabuhi sa paghigugma, sa bagay nga ginpadala man sang Anak ang Espiritu Santo agud aton mangin kabakud! Sa sini ginpahayag ang ISA ka KINATUHAY sang DIYOS– Amay, Anak, kag Espiritu Santo.


FR. RONNIE


MANGIN MAHIGUGMAON KA!

Ong tagsatagsa kanaton bahin et kasaysayan et katawhan paagi sa aton amay ag iloy. Kita nagtuhaw sa kalibutan indi bilang tawo nga nagaisahanon kundi tawo nga may kaangtanan sa iban nga tawo. Bunga kita et paghigugmaanay et daywa ka tawo nga nag-angotay. Gani kita may daon nga katungdanan nga maghigugma.
PAGHIGUGMA – amo dya ong kahulogan et fiesta et Santisima Trinidad. Ginasaulog kara ong PAGHIGUGMAANAY nga NAGA-ISA sa Amay, sa Anak ag sa Espiritu Santo. Bisan sanda Tatlo ka persona, Isa lang gyapon ong aton Dios. Ag dya amo gid ong nagakatabu sa aton man mga kaangtanan. Kon kita nagahigugma sa iban nga mga tawo, aton gid mabatyagan nga daw kita malapit ukon ISA gid kananda.
May isa ka maalam nga tawo nga nagsiling: “Ong Santisima Trinidad indi isa ka problema nga dapat naton solbaron, kundi isa ka misteryo nga dapat naton ikabuhi.” Dya ong mabahol ag padayon nga paghangkat kanaton: ONG PAGKABUHI SA PAGHIGUGMA! Gani, mahigugmaon gid man bala kita nga mga tawo? Ong aton mga desisyon sa kabuhi naangot lang bala pirme sa aton makitid nga kaayohan, ukon nagatinguha kita para sa ikaayo man et iban? Natamaran bala kita nga mangin matarung ag maalwan sa iban bangud sanda indi aton ‘kapamilya’ ukon ‘kapuso’? Pila un bala nga mga tawo ong aton natandog et gugma et Dios?



FR. DODO