Corpus Christi (A)

UNOD NGA NAGHATAG KABUHI!

Sa wala sing pagpangduha-duha, maathag nga kita makasiling nga kon indi kita magkaon, mapatay kita! Apang sa pihak nga bahin, ang pagkaon indi sang garantiya nga kita indi na mapatay! Pila sa aton gani ang napatay sa sobra nga paglamun!- Patay tungud sa “bangungut” ukon tungud sa “impasto”! Delikado man gali ang sobra nga pagkina-on. Dapat ang aton nga pagkaon “nagaka-igo” lang sa kinahanglanon sang aton nga lawas.
Sa aton nga selebrasyon karon, ginapahanumdum man kita sang isa ka sahi sa pagka-on, nga amo ang kalan-on sang aton “kalag”- ini amo ang kalan-on nga wala sang liwan kundi ang “unod” sang aton Ginuong Jesukristo nga aton makita sa bayhon sang tinapay kag bino. Suno sa Iya, ini nga pagkaon amo lamang ang “matuod-tuod” nga pagkaon nga makahatag sang kabuhi sa kapupun-an… kabuhi nga wala’y katapusan!
Indi ini katulad sang tawhanon nga pagkaon nga nagakadunot o pagkaon nga nagakapan-os. Indi ini katulad sang “umalagi” nga pagka-on nga bisan magpabusog pa kita, indi kita makapalagyo sa panawag sang kamatayon sa aton nga lawas. Ini nga pagka-on– ang lawas kag dugo sang aton Ginuo, amo lamang ang sarang makahatag sa aton sang kabuhi nga wala sing katapusan kay bisan madunot pa ang aton nga lawas sa tawohanon nga kamatayon, ini mangin aton “balon” sa pag-ambit sang kabuhi nga wala sing katapusan!
Kay sa aton pag-ambit sini nga pagkaon, naga-ambit man kita sang kabuhi sang aton Ginuong Jesukristo, kag ang Iya nga kabuhi isa ka kabuhi nga nagda-ug sang gahum sang kamatayon paagi sa iya PAGKABANHAW. Sa bagay nga ang pagpakig-ambit sang kabuhi sang aton Ginuo, pagpakig-ambit man sa kabuhi nga wala sing katapusan!

FR. RONNIE