Pentecost Sunday (A)

PAGPATAWAD…
Ang isa sa pinakamanami nga regalo sang aton Ginuong Jesukristo sa Iya nga pagkayab sa langit amo ang pagpadala sang isa ka Mananabang sa aton tunga nga amo ang mangin aton kabakud sa pagsumalang sa mga pagtilaw sa aton pagpanaksi sa Iyang Maayong Balita.
Sa sini nga Domingo, Iya nga ginpahayag kon ano ini nga sahi sang Mananabang– ini nagatulod sa aton sa pagbuhat kag sa pagtikang sa dalan sang PAGPATAWAD! Ini nga Mananabang amo ang magabulig kag magahatag sa aton sang kapasidad sa pagpatawad sa isa kag isa nga amo gid lang ang makadala sa aton sang KAHUSAYAN sa atubangan sang aton Amay sa langit. Sa bagay nga ginhatag sang aton Ginuo sa Iyang mga gintutun-an ang OTORIDAD sa pagpatawad paagi sa MINISTERYO sang Iya nga SIMBAHAN! Amo ini ang rason kon ngaman nga may yara kita nga Sakramento sang PAGKUMPISAR– diri indi nga tungud sa “personal” nga kapasidad sang isa ka pari nga siya “nagapatawad” kundi ini tungud kay paagi sa ministeryo sang Simbahan, siya gintugyanan nga mangin instrumento sa pagdala sang kahusayan sa tunga sang tawo kag sang Diyos. Sa bagay nga kon ang isa ka pari maghatag sang “kapatawaran” o “absolusyon” siya wala nagasiling nga ginapatawad ko ikaw suno sa AKON ikasarang, kundi ginapatawad ko ikaw sa “gahum sang Santa Iglesia nga ginhatag sa akon, sa ngalan sang AMAY, kag sang ANAK, kag sang ESPIRITU SANTO.”
Pagpatawad? Sus KABUDLAY man sina Padre? Amo gani nga kinahanglan naton ang Espiritu Santo. Siya ang magatudlo sa aton sa pagpatawad! Pangayuon naton ang Iya kabakud agud kita magtuon sa pagpatawad sa isa kag isa!

FR. RONNIE

NAKA-DRUGS KA?
Kon ong isa ka tawo nga mahipuson ag hinali lang mangakig sa sala nga ginahimo et ana mga kaibahan, nagapamangkut kita dayon: “Naano to sia man? Napossessed ka?” Kon ong isa naman ka tawo nga daw indi gid man maalam, hinali lang naghinala et ‘straight english’, nagapanumdom kita dayon: “Naano to sia man? Nakainum o hubog ka?” Kon ong isa ka tawo nga mahina, hinali lang nagdasig ag nagpakita et grabe nga ‘adrenaline’, kita dayon nagamuno kanana: “Naano ka man? Naka-drugs ka?”
Sa aton panahon, ong tanan nga mga tawo nagapangita et kahulogan et anda nga kabuhi. Apang masami, ong nagatulod o ‘naga-inspired’ kananda amo ong espiritu et kalibutan. Ong espiritu et kahakug ag kompetisyon; ong espiritu et ulag ag patuyang; ong espiritu et kaakig ag pagtimalus; ong espiritu et bugal ag katig-a et ulo ag taguipusuon. Ong owa naton nasaydan amo nga dya nga mga espiritu nagapalain et aton relasyon sa Dios ag sa aton mga isigkatawo.
Sa panumdoman et Dios, may isa lamang ka espiritu nga aton kinahanglan. Isa lamang ka espiritu nga makapaumpaw et tanan naton nga kauhaw ag kagutom. Isa lamang ka espiritu nga makatao et minatuod nga kahulogan sa aton kabuhi. Ag ina amo ong Espiritu Santo. Kon kita ginatuytoyan et kara nga Espiritu, ukon dya nga espiritu amo ong nagatulod ag naga-inspired kanaton sa tanan naton nga ginahimo sa aton kabuhi, piho ag segurado nga mangin balaan ag makahulogan gid ong aton kabuhi. Lantawa lang bala ong kabuhi et aton mga santos, ong aton mga baganihan sa Simbahan! Gani, ano bala nga espiritu ong nagatulod o naga-inspired kanimo?
Mabuhay ong Maalwan nga mga Mambusaonon!


FR. DODO