1st Sunday of Advent (A)

ANG ATON GINAHANDAAN
Nagasugud naman kita sa isa ka bag-o nga pahina sa aton Kalendaryo Liturhiko sa Simbahan paagi sa aton pagsaulog sang Panahon sang Adbiento. Ang Adbiento naghalin sa tinaga nga “adventus”, buot silingon “ang pag-abut”. Sa pag-abut nga hitabo, duha ka mga bagay ang aton ginatumud. Ang manug-abut, kag ang nagapa-abut.
Sa pagkamatuod, ang manug-abut nga aton ginahulat, naka-abut na kag nagkabuhi na gani upud sa aton, apang Siya magakari liwat kag maga-abut bilang isa ka Hari sa isa ka bag-o nga panahon– ang panahon sang kahimayaan. Apang sa tunga sining duha ka klase nga pag-abut, may yara kita nga dapat talupangdon– Ang Iya nga pag-abut sa aton “adlaw-adlaw” nga pagpangabuhi. Ini nga pag-abut amo ang masami nga wala naton ginatalupangud tungud nawili kita sa madamo nga mga kalingawan sa sining kalibutan. Sa bagay nga masiling naton nga kon nahanungud sa aton ginapa-abut, wala kita sang ‘problema’ tungudSiya sigurado nga naga-abut sa aton tunga. Ang ‘problema’ yara sa bahin sang nagapa-abut– sa ATON!
Sa una nga pag-abut sang aton Ginuo, Siya nagpahayag sang Iya kaugalingon sa isa ka kubus nga bata nga natawo sa pasungan, kag Siya padayon nga nagbantala nga Siya
padayon nga magapahayag sang Iya kaugalinon paagi sa mga ginagutum, gina-uhaw, ginpabay-an, kag mga ginbilanggo!- Sa mga PINAKAKUBOS! Gani Siya nagapahanumdum sa aton subong nga “magmanginhanda” kita agud matalupangdan naton Siya!


FR.RONNIE



NAGAHIMO ET OBLIGASYON…

“May estorya nahanungod kay Colonel Davenport, ong Speaker et Connecticut House of Representatives nga natabu sadto anay sang 1789. Isa ka adlaw, samtang nagasession ong mga Kongregista, hinali lang nga nagdulom ong langit ag kahawaan. Ong iban nga mga Congressman naglantaw sa bintana ag nagpanumdom nga katapusan un et kalibutan. Dayon may daon nga kinagula sa mga Kongregista nga nagdemand et “immediate adjournment”. Apang si Davenport nagtindog ag naghambal: “Mga halangdon nga mga Congressman, ong Adlaw et Paghukom daw nagaabot un ukon indi man. Kon indi dya ong katapusan, ti, owa kita nagakinahanglan et “adjournment”. Pero kon amo un gid man dya ong tion, akon ginapili nga makit-an nga nagahimo et akon obligasyon. Gani, akon ginahinyo nga dalhon duri ong mga kandela.” Gindala ong mga kandela ag ong session nagpadayon.”
Si Kristo nagapanawagan manakara sa Ebanghelyo sa Pagbantay ag Paghanda. Ong pagbantay o paghanda owa nagatumod sa kahadluk nga ginatuga et pagpanumdom nahanungod sa makangilidlis nga mga matabu sa katapusan et kalibutan. Kundi dya nagakahulogan, kon kay Colonel Davenport pa, et matutom nga paghimo et aton mga obligasyon bilang mga Anak et Dios ag Manunubli et Langit. Buot silingon, ong matuod nga paghanda o ong indi pagpapirotpirot et mata amo ong pagkabuhi et matutom nga pag-alagad sa Ginuo, nga nagasunod et ana mga Kasugoan ag nagapabilin sa ana Grasya.



FR. DODO