CHRIST THE KING (c)

ANG HARI NGA GINYAGUTA!
Ang laragway nga ginpakita subong sa aton ni San Lukas sang aton Ginuo, amo ang laragway sang isa ka “hari” nga ang iya korona amo ang mga tunok, kag ang Iya trono amo ang kahoy nga Krus. Isa ka hari nga ginapasipalahan, ginapakahuy-an, kag ginayaguta sang iya kaugalingon nga katawhan... isa ka hari nga ginkabig nga “kriminal” sang iya mga kasimanwa… isa ka hari nga disidido nga manginmatay para sa iya mga katawohan!
Daw ano ka makatalanhaga ini nga selebrasyon sa pagtakup sang kalendaryo liturhiko sang aton nga Simbahan. Ini ginabuhat naton sa pagsaulog sang kapiestahan ni Kristo nga Hari– Cristo Rey.
Si Kristo ginapahayag naton nga aton Hari indi katulad sang mga hari sa sining kalibutan, kundi isa ka hari nga pinasahi. Pinasahi tungud ang Iyang pagkahari, KABALISKARAN sa mga hari sa sining kalibutan. Siya indi sang hari nga gina-alagaran, kundi hari nga NAGA-ALAGAD! Siya indi hari nga nagapamigos kundi hari nga NAGPAPIGOS agud sa pagbayad sang aton kasal-anan! Siya indi hari nga NAGADUMUT kundi Siya hari nga sa gihapon BUKAS SA PAGPATAWAD!
Ini ginapahayag subong sang aton Ebanghelyo sa Iya mga pulong nga ginsambit sa isa ka kriminal nga nagpangayo sang kapatawaran. Siya nagsiling: “Nagasiling ako sa imo, karon gid nga adlaw mangin kaupod ka nakon sa Paraiso!”
Amo ini ang aton Hari! Hari nga napun-an sang paghigugma, paghangup, kag pagpatawad. Diri naton ginabase ang aton pagkabuhi bilang Iya sumulunod!

FR.RONNIE
ONG HARI NGA INDI MAGLUWAS ET ANA KAUGALINGON!
“Mga pila lang ka tuig ong nagligad, sa isa ka bus sa Sweden, may isa ka soldado nga Amerikano nga nagsiling sa isa ka pasahero nga daon sa ana kilid: “Bal-an mo, ong Amerika un guro ong pinakademokratiko nga nasyon sa bilog nga kalibutan. Kay bisan ong mga pinakaordinaryo nga pumuluyo sarang makaadto sa ‘White House’ ag makapakigkita o makapakighala sa Presidente…” Ong tawo nga ana ginhambalan nagsabat kanana: “Pegado on. Duri sa Sweden, ong Hari ag ong mga tawo palareho nga nagasakay sa bus…” Sang nagapanaug ong Amerikano sa bus, siya ginsingganan nga siya nagapungko nga ingod gid ni King Gustav Adolf VI et Sweden.”
Sa aton kabuhi, duro gid kanaton ong owa pa makakita et Hari sa personal. Kay masami, daon sanda sa mga palasyo ag nagapungko sa anda trono. Ag owa sanda et paki sa pag-imbitar kanimo porque ikaw ordinaryo lang nga tawo. Apang ong Kristo nga Hari lain kananda. Owa tana sia nagapungko sa trono, siya nalansang sa Krus. Owa tana siya et korona nga puno et diamante ag bulawan, korona nga tunukon ong sa ana. Si Kristo Hari nga nagaantus, indi et hari nga nagapalupos. Ngaman? Sa pagpahanumdom kanaton nga ong aton Hari MALAPIT ag indi malayo kanaton. Kon kita nagabatyag et kaluya, kasakit ag kahuya, siya UNA un nga nagbatyag kaon. Owa ka bala nakatalupangud nga sa tagsa ka hulut et ospital may daon nga Krus? Dya agud ipahanumdom gid kanaton nga ong aton Hari malapit ag upod gid naton sa aton mga kakulangan ag kasakitan.
Halin pa sang una, nilibo ukon minilyon un ong nagpakamatay nga mga tawo para sa anda hari. Apang kita lang nga mga Kristiano ong nagadayaw sa isa ka hari nga nagpanginmatay para kanaton. Handa ka man bala sa pagpanginmatay para kanana?


FR. DODO