2nd Sunday of Advent (A)

PAGBUNYAG SA KALAYO KAG ESPIRITU!
Sa daan nga Kasugtanan sang Bibliya, ang imahen sang kalayo tuman ka makahulugan sa “giho” sang Diyos kag sang Iya mga ginabuhat sa kalibutan kag sa tagsa ka kabuhi sang tawo. Ang Diyos kon kaisa, nagapahayag sang Iya kaugalingon paagi sa kalayo, katulad sang Iya nga pagpahayag kay Moises sa “nagadaba-daba” nga kahoy nga wala nagakasunog. Sa libro ni Ezekeil nga Propeta ang Diyos nagapahayag sang Iya nga “pagpangapin” paagi sa imahen sang kalayo (Ez. 1:4, 13). Sa kay Isaias nga Propeta ginpahayag man ang “silot” sang Diyos paagi sa kalayo (Is. 66:15-16). Sa Bag-o nga Kasugtanan, ang kalayo ginagamit sang Espiritu Santo nga imahen sa “pagpatin-aw kag pagpaninlo” (Mt. 3:11 & Bin. 2:3).
Sa aton Ebanghelyo subong ginapakita si Juan Bautista nga “nagasilabo” sa iya nga balatyagon sa pagpakilala sa aton Ginuo kag sa pag-abut sang Iya nga ginharian. Ginasiling sa Ebanghelyo nga si Juan Bautista “napun-an sang Espiritu Santo bisan nga yara pa siya sa tagu-angkan sang iya nga iloy” (Lk. 1:41). Ining “kalayo” sang Espiritu Santo amo ang nagtulud sa iya nga mangin “Manugbantala” sang manug-abut nga Manluluwas!
Ang mensahe ni Juan Bautista amo ang “pagpamukaw” sa mga tawo nga nagapatumbaya kag daw sa mga “wala sing labut” sa mga nagakahanabo. Isa ka pagpanawag sa pagkilala sa aton Ginuo sa aton tunga, kag sa pagliso sa Iya kon kita nagtalang sa ginapaabut nga matarung nga pagkabuhi. Si Juan nagapahanumdum sa aton nga “Iya” kita sang Diyos! Kita ginbuhat sa Iya laragway sa bagay nga dapat magkabuhi kita sang nagakaigo bilang Iya mga anak!
FR.RONNIE


DPWH SECRETARY
Ong tanan nga mga “artificially-made roads” nga aton ginaagyan manakara nag-ugat sa mga alagyan nga ginpaobra et mga hari sang una pa agud sanda man ong magaagi kaon. Ginatawag yaon nga “the king’s highway”. Gina-repair lang on kon ong hari kinahanglan nga mag-agi dira. Si San Juan Bautista ong nagpreparar sa alagyan et Kristo nga Hari. Sya nagasinggit sa pagtadlong ag pagtapan et mga dalan bilang preparasyon sa pag-abot et Hari nga Manunubos. Kay para kanana, amo lang dya ong paagi agud piho nga maangkon gid naton ong kaluwasan et manug-abot nga Ginuo.
Sa pagkamatuod, ong pinakalip-ot ag pinakamadasig nga distansya sa tunga et daywa ka punto amo ong isa ka tadlong nga linya. Kon ong Dios daon nagatindog sa isa ka lugar ag kita daon man sa pihak nga punta, ong tadlong ag matapan nga alagyan indi lamang nagapahapos et aton pag-adto kanana kundi nagapadasig gid.
Ong ginasinggit ni San Juan nga pagtadlong ag pagtapan et dalan bilang takus nga pag-aman sa pag-abot et Ginuo owa nagatumod et minatuod nga ginatapakan ta nga mga kalsada, pediroad o alagyan kundi sa pagtadlong ag pagtapan et aton kabuhi. Ong aton kabuhi amo ong matuod nga dalan konsadiin magaabot ong Manluluwas. Gani kon ong aton kabuhi gatikotiko, lubaklubak, kudolkudol, ukon ong nagalakat dira daw sa piang o daw ginbalda pagkatapos, ti kon ikaw ong hari, maagi ka man bala dira? Si San Juan Bautista amo ong pinakamaayo nga Secretary et DPWH et bisan ano man nga pungsod. Haman? Tungod sya indi corrupt. Sya mismo isa ka tadlong ag matapan nga dalan. Nahimo nana nga ong pag-abot et Ginuo indi lamang madasig kundi mahupos ag matawhay! Amo man tani kaon ong aton kabuhi manakara…

FR. DODO