Corpus Christi (B)

KALIG-ONAN SANG KASUGTANAN !
Kapiestahan Solemne karon nga adlaw sang Hamili nga Lawas kag Dugo sang aton Ginuong Jesukristo. Ini nga pagpadungug sa aton Ginuo nagatumud sa isa ka daku nga Misteryo sang paghigugma nga ginpatuhoy sang Dios sa aton tanan– ang paghigugma nga nag-abut sa paghalad sang jabuhi sang Iya nga nga Anak agud kita matubos gikan sa pagka-ulipon sang sala.
Ini nga selebrasyon aton ginpanubli sa selebrasyon anay sang mga Judeo. Sila may selebrasyon sang Paskwa sa pagsaulog sang ila kahilwayan gikan sa Ehipto nga ginasimbolo sang duha ka mga bagay- ang TINAPAY nga wala sing lebadora nga nagsimbolo sang kahilwayan, kag ang DUGO (kalis sang bino) nga nagasimbolo sang paghimo sang Israel bilang banwa nga pinili sang Dios.
Ang ginbuhat sang aton Ginuo sa katapusan nga panihapon indi lamang sang isa ka paghanduraw sang selebrasyon sang mga Judeo kundi isa ka paghatag man sa aton sang isa ka SINUMPAAN indi lamang paagi sa tinapay nga nagakapan-os, kundi paagi sa tinapay nga amo ang Iya kaugalingon nga lawas, kag indi lamang paagi sa dugo sang mga sapat, kundi paagi sa Iya kaugalingon mismo nga dugo nga amo ang nagasilyo sini nga kasugtanan kag kahilwayan.
Paagi sa Iya ginbuhat sa katapusan nga panihapon, Iya ginhatagan sang bag-o nga kahimtangan ang kaangtanan sang Dios kag sang tawo. Ang kasugtanan karon sa tunga sang tawo kag sang Dios nangin isa ka MALAHALON nga kasugtanan tungud ini ginpalig-on sang PAGHALAD SANG KABUHI sang aton Ginuo– LAWAS KAG DUGO– nga ginpamihak-pihak kag ginpa-ilig sa aton agud aton maangkon liwat ang dignidad nga kita mga anak sang Dios.


FR. RONNIE



EUCHARISTIC PROCESSION
Ong kapiestahan et Corpus Christi ginhimo nga pangkalibutanon nga kahiwatan sa aton Simbahan ni Santo Papa Urban IV sang 1264. Ong isa ka tradisyon nga nagatao et duag halin pa sang una amo ong “Eucharistic Procession” ukon ong pagprosesyon et Mahal nga Hostia nga daon sa Monstrance, nga ginaimawan et tanan nga mga kalalakihan sa bilog nga banwa. Dya nga selebrasyon amo ong ginakabig nga pambato batok sa tanan nga heretiko nga pagpati nga nagakontra sa Minatuod nga Presensya et Kristo sa Santos nga Misa, sa bayhon et Tinapay ag Bino.
Sa ana pagpamalandong nahanungod et karang tradisyon nga aton ginapadayon bisan hasta manakara, ong aton anay Santo Papa ag karon Beato Juan Pablo II nagtugda: “Pwera sa anang orihinal nga importansya bilang sabat sa mga sala nga pagpati sa matuod nga presensya ni Kristo sa Eukaristiya, ong prosesyon kinahanglan gihapon ag makahulogan. Ong aton pagtuo sa Dios nga nahimo nga tawo ag nag-imaw gid kanaton kinahanglan nga IWARAGWAG, labi un gid, sa aton mga karsada ag mga puloy-an, bilang pagpakita et aton pagpasalamat ag paghigugma ag mangin gikanan et nagadasondason nga bendisyon para kanaton. Ong “Eucharistic Procession” nagapahanumdom gid kanaton kon paano ong buhi ag nabanhaw nga Kristo nag-imaw sa pagpanaw sa bilog nga adlaw sa sadtong daywa ka mga gintutun-an paadto sa Uma.(cf. Luke 24)”
Kabay pa unta nga dyang Domingo et Corpus Christi magpahanumdom ag magpaanting pa gid et aton pagtuo sa minatuod nga presensya ni Kristo sa Santos nga Misa!
Mabuhay ong Maalwan nga mga Mambusaonon!


FR. DODO