Friday, December 30, 2011

Mary Mother of God (B)

PAGPAMALANDONG SA KAGAMO...

Nagasugod ang bag-ong tuig sa aton pagpahayag nga si Maria amo ang aton ILOY! Ang iloy nagadala kag nagasagud sang kabuhi sa iya tagu-angkan. Kon ang bata mabun-ag na, padayon pa niya ini nga ginasapupo kag ginabantayan.
Sa Ebanghelyo makita naton si Maria nga “mahipos” nga nagabantay. Sang mabatian niya ang makatili -ngala nga mga hitabo nga ginapanugid sang mga manugbantay sang karnero “gintipigan niya ini nga mga butang kag ginpamalandungan sa iya kaugali -ngon” (Lk 2:19).
Si Maria nagahatag sa aton sang pamalandungon nga lain sang sa magahod nga mga pagsinadya nga dala sang Bag-ong Tuig.
Ang pagkatawo ukon ang bag-o nga kabuhi amo ang labing importante kag makatalanhaga nga bugay. Ini ang ganhaan pakadto sa pagpanglakaton agud pangitaon ang plano sang Diyos para sa aton.
Ang pinakamaayo nga paagi sa pagselebrar sang kabuhi amo ang pagtipig sini sa aton tagipusuon. Nagakahulugan ini nga kinahanglan naton ang tion agud nga mag-isahanon, magbinag-binag, kag magpangamuyo!- Wala gid sang gindulot nga maayo ang “kinagamo” sa pagsug-alaw sang Bag-ong Tuig!
Ang malinong kag simple nga pagginawi– suno sa pagginawi ni Maria– nagahatag sa aton sing kusog sa pag-atubang sa mga hangkat sang kabuhi– sa kasadya ukon sa kasakit! HAPPY NEW YEAR TO ALL!

FR. RONNIE



LANOG

Isa ka adlaw, nagsinggit ong isa ka nagahampang nga unga sa ibabaw et bukid: “Sin-o ka?” Ag ana nabatian ong isa ka limog nga nagasinggit man: “Sin-o ka?” Karon nagsinggit sia liwat: “Gago ka!” Ag ong limog nagsabat man kanana: “Gago ka!” Dayon nagpauli sia nga natingala ag ginsaysay ong ana experiensya sa ana iloy. Ong ana nanay naglaygay kanana nga maghambal et maayo sa limog: “Maghambal ka et “I love you” sa limog ag lantawa kon ano ong ana ibalos!” Gani pagkahin-aga, ong unga nagsaka liwat sa bukid ag nagsinggit: “Palangga ta ka!” Ag ong limog nagsabat: “Palangga ta ka!” Ong unga NALIPAY sa ana nabatian.
Ong estorya et nagalanog nga limog estorya man et aton kabuhi. Ong kalibutan nagapabalik lamang kanaton kon ano ong aton ginatao kara. Kon kita maayo, aton man gina-expectar nga ong kalibutan maayo. Kon kita malain, aton man ginapanumdom nga ong tanan sa kalibutan malain. Kon ano man ong aton ginatao sa kalibutan, amo man on ong nagabalik kanaton. Gani kon gusto naton ong maayo, dapat maghimo kita et maayo ag mangin maayo.
Luyag naton papason ong kalainan ag malas paagi sa malimali – BILOG nga mga butang sa sulod et balay, POLKA DOTS sa aton mga bayu ukon paagi sa PALUPOK. Ngaman indi naton pag-ilogon ong estratehiya et mga manugbantay et karnero ag ni Santa Maria? Ong mga manugbantay et karnero NAGPILI, labaw sa tanan, sa pagpangita sa unga, ong Mesias nga ginapaabot et tanan. Si Santa Maria nakadiskubre et PAGGIHO et Dios sa ana kabuhi. Sanda ong aton mga modelo sa aton pagsugod et karang NEW YEAR nga may POSITIBO nga panimuot ag nagakalipay sa kon ano ong maayo ag indi sa malain, nga nagakatabu sa aton, sa aton mga isigkatawo ag sa aton kalibutan.
Happy New Year sa Maalwan nga mga Mambusaonon!
FR. DODO

No comments: