4th Sunday of Advent (B)

ANG EVA NANGIN AVE

Sentro sang aton selebrasyon karon nga Dominggo amo ang aton Mahal nga Iloy Birhen Maria. Sa Ebanghelyo, ginasaysay sa aton ang “misteryo” sang pagpaka-”unod” sang Diyos, kag ini nagsugud sa pagtunda sang anghel sa isa ka birhen ukon ulay nga dalaga nga ang iya ngalan amo si Maria.
Bisan halos indi makahangup si Maria sang mensahe sang anghel nga siya mangin Iloy sang Diyos nga magapakatawo, siya nagsabat: “Alagad ako sang Ginuo. Kabay nga matuman ini sa akon suno sa imo ginsiling.” Si Maria, nagsalig sa pulong sang anghel tungud siya nakahibalo nga ini nga anghel amo ang tagbalita sang Diyos nga indi sarang magbutig sa iya.
Ginasiling ni San Pablo nga si Maria amo ang bag-o nga Eva, kag aton Ginuo amo ang bag-o nga Adan. Subong nga ang kasal-anan nagsulod sa kalibutan tungud sang pagkamalalison sang una nga Adan kag Eva, sa amo man nga paagi, ang kaluwasan sang kalibutan nag-abot tungud sang pagkamasinulundon ni Maria kag ni Jesus nga amo ang aton bag-o nga modelo sang isa ka bag-o nga katawhan.
Indi bala matahum nga pamalandungan nga ang Eva nga nangin gingikanan sang aton kalaglagan, sa pagkatawo ni Maria nangin Ave sa mata sang aton Manunuga?– AVE– Himaya kag Pagdayaw!... Ang babayi nga nangin gikanan sang kapaslawan kag pagsumpa sa tawo, sa pagkatawo ni Maria nangin himaya, kadayawan, kag kaluwasan sang bug-os nga katawhan.
Amo ini ang papel ni Maria sa kaluwasan . Amo gani nga siya NAHAMUT-AN sang Diyos!

FR. RONNIE



TAGBALAY!

Sa isa ka despedida party et mga magagraduar sa High School, ong isa ka maestra gin-imbitar sa pagtao et ‘inspirational talk’. Nagsiling sia kananda: “Nasaydan ko et piho nga mangin ‘successful’ gid kamo sa ulihe. Apang panumdomon nyo pirme ag indi gid pagkalimtan nga ONG PESO INDI MANGIN PESO, KON OWA ET ISA KA CENTIMO! Ag ako ong isa ka centimo nga on sa kadalag-an nyo…”
Samtang kita nagapadayon sa pagpamalandong sa misteryo et INCARNATION ni Kristo, indi naton mahamulag ong pagpanumdom kay Santa Maria bilang isa ka kubos apang importante nga centimo sa kabuhi nana. Kay kon owa si Mama Mary nagpahuo, basi owa kita et may ginaselebrar nga Christmas manakara ukon ong bug-os nga kasaysayan et kaluwasan isulat liwat sa lain nga paagi.
Apang aton nahibaluan nga si Santa Maria nagpasugot ukon nagpahuo sa kabubut-on et Dios nga mangin Iloy et Mesias. Si Santa Maria nagpasulod ensegueda sa Dios sang dya magpanuktok sa ana taguangkan. Kay ong Pagtunda, siling ni Bishop Soc Villegas, amo nga ong Dios nagapangayo kay Maria nga pasudlon sia. Daw ong Dios nagahambal kay Maria, “Tagbalay!” ag si Maria nagsabat: “Sulod ka!”
Amo gid dya ong minatuod nga kahulogan et Christmas: indi nga mahimo kita et balay para sa Dios nga nahimo sa bulawan ag diamante, kundi nga PASUGTAN ONG DIOS NGA HIMUON ONG ATON MGA TAGUIPUSUON NGA BALAY NANA. Gani pareho kay Santa Maria, ong Dios nagapanagbalay man kanaton. Ano bala ong aton ginasabat kanana?
Mabuhay ong Maalwan nga mga Mambusaonon!

FR. DODO