27th Sunday in Ord. Time (A)

IPA-AGSA SA IBAN

Ang Maayong Balita sang atonAmay sa langit una nga ginbantala sa mga Judeo– sa pungsod nga ginpili sang Diyos. Sila amo ang “chosen people” suno sa aton moderno nga linggwahe, apang bisan pa sa mga kaayo nga ginpakita sang aton Amay, sugod pa sa panahon sang “exodus” gikan sa Ehipto pakadto sa isa ka “Duta nga Ginpangako” sang Mahal nga Diyos, sa gihapon nagpabilin nga “matig-a” ang ila nga tagipusuon sa pagpati kag pagtuo nga ang Diyos nagalab-ut gid sa Iya mga tawo.
Sa bagay nga nag-abut ang tion nga bisan pa ang Bugtong nga Anak sang aton Amay sa langit Iya nga ginpadala agud sa pagdala sang Maayong Balita kag kaluwasan sa bug-os nga katawhan. Sa pihak nga bahin, sa gihapon nagpabilin sila nga “buta kag bungol” sa panawagan sang Mahal nga Diyos, nga bisan ang aton Ginuo ila pa natubsan nga pasakaan sang panumbungon bilang isa ka “kriminal” kag ginpamatbatan sang kamatayon sa Krus!
Diri nasentro ang palaanggiran sang aton Ginuo subong nga Dominggo. Ang presensya sang aton Ginuo isa ka manggad para sa mga tawo nga “nagabaton” sa Iya sa ila kabuhi, apang kon padayon naton nga ginabalibaran ang “kaalwan” sang Mahal nga Diyos, Siya magakuha sini nga manggad kag ini igahatag sa iban nga bukas sa pagbaton sini.
Ining Maayong Balita padayon nga ginatan-ay sa aton sang aton Ginuo sa tagsa-tagsa. Bukas bala ang aton tagipuson sa pagbaton kag pagbag-o sang aton kabuhi? Yari na ini sa aton tunga! Ginahakus ta bala ini bilang aton matuod-tuod nga manggad?

FR. RONNIE


KINAHANGLAN TA MAGPAMUNGA

Ong palaanggiran et Talamnan et Ubas nagasugid kanaton et kapintas et mga agsador nga nagpamatay et mga suloguon et tag-iya. Anda man dya ginhimo sa ana anak ag heredero. Gani tungod et anda kapintas, ong ginharian et Dios bawion sa mga ‘agsador’.
Si Jesus nagtumod sa mga pinuno et Israel bilang amo ong mga mapintas nga mga agsador. Dya sanda pagaislan et iban nga mga pinuno. Ag ong katilingban ni San Mateo nga ginabuylogan et mga Judeo ag mga Hentil, nagasiling nga sanda karon ong bag-o nga “Ethnos” – ong mga tawo nga nagpanubli et talamnan. Kaangay et Israel sang una, sanda amo “ong pinili nga kaliwat, harianon nga katilingban et mga pari, balaan nga pungsod, katawhan nga ana et Dios” (1 Ped 2:9) Ag gani, kinahanglan nga ipakita nanda nga nagakabagay sanda sa kara nga pagtawag paagi sa pagpamunga et hustisya ag paghidait, agod nga ong ngalan et Dios indi pagtampalason bangud kananda.
Karon, kita nga mga Katoliko nga Kristiano amo ong tiglawas et karang bag-o nga komunidad ni Kristo. Ong tagsa-tagsa ginatawag sa pag-obra sa talamnan et ubas et Ginuo. Apang nagapamunga bala kita et duro? Kon ong aton sabat: “Huo, nagakabuhi gid man ko ya bilang minatuod nga Katoliko, sa pulong ag buhat!”, ti maayo ag padayuna. Apang kon owa man lang kita nagapatubas et ginapaabot et Dios kanaton, ti kinahanglan ta un nga magpamalandong ag magbag-o. Kay basi ukon pat-ud gid nga matabo kanaton ong natabu sa mga tawo nga pinili sang una: “Ong Ginharian et Dios kuhaon sa inyo ag itao sa mga tawo nga nagapatubas et nagakaigo nga mga bunga!”
Mabuhay ong Maalwan nga mga Mambusaonon!

FR. DODO