4th Sunday of Lent (A)

NAGBALIK NGA NAKAKITA

Ang pagsumalang sa aton Ginuong Jesus masami nagapakita sang isa ka PAGPANIBAG-O, suno sa mga ginapahayag sang mga pulong sang Ebanghelyo. Amo gani nga ginatawag ang pulong sang Diyos nga MAAYONG BALITA.
Amo ini ang natabo sa isa ka bulag sugud pa sa iya pagkatawo. Suno sa pagpati sang mga Judeo, ini nga mga kakulangan sang isa ka tawo, nagapahayag lamang sang “silot” sang Diyos, ayhan tungud sa kasal-anan sang iya mga katigulanggan, ginikanan, ukon ang iya personal nga mga kasal-anan. Kon sa aton pa: “Mirisi! Amo na kay damo ka na sang sala sa Diyos!”
Amo bala ini nga sahi sang Diyos ang ginapakilala sang aton Ginuo? Suno sa aton Ebanghelyo, ang aton Ginuo, naghimo sang seremonyas sang pagpang-ayo sa sini nga bulag, kag ginpalakat siya sa paghugas sang iya mga mata sa “punong” sang Siloe (ang lugar nga nagakahulugan “Ginpadala”). Kag sa pagsunud sang bulag sa ginpabuhat sang aton Ginuo, natabo ang milagro sang PAG-AYO– Nakakita siya!
Ang panahon sang kwaresma, isa ka ti-on sa diin kita ginapabatyag sang kaluoy kag pagpatawad sang Diyos tungud sang Iya nga paghigugma sa aton. Indi Siya sang Diyos nga nagadumut, ukon Diyos nga matimaluson. Siya Diyos nga nagalab-ut sa Iya mga tawo kag handa sa paghatag sang kahigayunan sa tagsa-tagsa sa paglakat sa idalum sang kasanag sang Iya pagpatawad kag gugma.
Ang pagsumalang sa aton Ginuo, nagatulud sa aton sa pagbalik nga may bag-o nga panan-awan. Bag-o nga mga mata nga makakita sang maathag! - Makakita sang kamayaran kag indi ang kalainan!


FR. RONNIE


DULOM – PAWA!

“Isa ka adlaw, nag-away ong isa ka mag-asawa. Tungod sa sobra nga kaingit sa isa ag isa, owa un sanda nagsapakanay. Kon sa aton pa, tungod owa et gusto magpalolos, ang una nga maghambal, pierde.
Sa masunod nga adlaw, kinahanglan sang bana magbugtaw et agahon para sa ana “FLIGHT”. Gani nagsulat sya sa ana asawa: “Pukawa ako alas-5 hin-aga.” Pagkahin-aga, nagbugtaw sya alas-7. Ingit-ingit gid sya kay binayaan un sya et eroplano. Dayon, nagtulok sya sa ulunan sa kilid nana. Ag didto, ana nakita ong hanggud nga sulat et ana asawa: “Hoy bugtaw! Alas-5 un. Basi ma-late ka sa imo ‘flight’!” Leksyon? Kon owa et pagpalolos ag sigihon ta lang ong aton bugal, owa gid et maayo nga matabu kanaton.
Sa Ebanghelyo, ginapakita sa aton ong daywa ka klase et bulag: 1. Ong ‘PISIKAL’ nga Bulag 2. Ong ‘SPIRITUAL’ nga Bulag. Sa una, dya nagatumod sa bulag nga gin-ayo ni Kristo, nga bulag gid man ya kay indi sya makakita apang gusto makakita. Kag ong ikaduha nagatumod sa bulag nga mga Phariseo, nga matuod nga makakita apang indi gusto makakita ukon nagapabulagbulag lang tungod sang bugal.
Karon, kon ong aton kabuhi isa ka pagpanglakaton nga nagaamar et maayo nga dalangtan, buot silingon, ong bulag nga gin-ayo ni Kristo nagpanglakaton “gikan sa kadulom paadto sa kasanag” samtang ong mga Phariseo nagpanglakaton “gikan sa kadulom pakadto pa gid sa kadudolman o kadadalman”. Sa diin kita sa kara nga daywa? Ukon sa aton tana kabuhi, diin duri nga pagpanglakaton ong aton ginausoy?
Mabuhay ong Maalwan nga mga Mambusaonon!

FR. DODO