2nd Sun. Easter- A

AKO MAN NAGAPADALA SA INYO...
Ang ginasaulog naton nga kapiestahan subong amo ang “Domingo sang Diosnon nga Kaluoy”. Sang una anay, ginatawag ini nga Domingo ni “Tomas nga Madinudahon” ukon “Doubting Thomas Sunday”. Apang sang si Papa Juan Pablo II, nga igadeklarar man nga Santo ni Papa Benedicto XVI, sa sini nga Mayo 1, 2011, ang nagpili-an bilang Santo Papa sadto nga tion, nagpahayag, nga ini nga adlaw mangin adlaw sang Diosnon nga Kaluoy o Divine Mercy Sunday.
Ayhan ini tungud sa painu-ino nga bisan pa nga si Tomas nangin madinudahon sa aton Ginuo, katulad sa kalabanan sa aton, sa gihapon wala mag-untat ang Mahal nga Diyos sa pagtan-ay sang Iya nga KALUOY sa aton. Bisan pa nga sa masami, kita nagpangduha-duha kon bala ang Diyos matuod gid nga yari sa aton luyo, sa gihapon, Iya nga ginapabatyag sa aton ang Iya nga paghangup kag pag-alungay, nga sa ulihi kita man makapanaksi katulad ni Tomas nga nagasiling: “Ginuo ko kag Diyos ko!”
“We gained salvation, not because we deserve it, but because of the grace and mercy of God.” Kay kon aton lang nga latawon ang aton kaugalingon, wala gid kita sang sarang mapabugal sa atubangan sang Mahal nga Diyos. Sa pagkamatuod, dapat gani kita MAHUYA tungud sang aton PAGKAMAKASASALA!
Sa likod sini tanan, ginalab-ot kita sang kasing-kasing sang aton Ginuong Jesus sa paghangup kag paghigugma agud kita magliso kag magpanumbalik sa aton Amay. Kabay unta nga MAGMALULOY-ON kita!

FR. RONNIE

PAGTUO NGA OWA NAGAPANGDUHADUHA
“Sang una, may isa ka tawo nga nagsiling: “Kon indi ko makita ong Dios sa akon kaugalingon nga mga mata, indi gid ako magpati kanana.” Ong ana amigo hantup nga nagpangamuyo gid para sa ana konbersyon, hasta, isa ka adlaw, ong Dios nagmando sa ana sa damgo: “Hambala ong imo amigo nga magapakita ako kanana sa bukid et Balat-an hindon gid nga gabii!” Ginhambalan nana ong ana amigo et ginhambal et Dios kanana, ag dya nagsaka sa bukid, ag didto ana gid nakita ong Dios. Pagbalik nana sa banwa, ong ana amigo “excited” nga nagpangutana kanana: “Karon nga nakita mo un gid ong Dios, ti nagatuo ka un gid kanana?” Ong ana amigo nagsabat: “Owa man gyapon! Huo, tama nga may nakita gid man ako didto sa bukid. Pero labot ko man ya kon Dios un gid man ato!”
Si R. H. Benson nagsiling: “Ong tawo nga nagasiling: “Kon indi ko ma-feel, indi ako magpati”, pareho lang et tawo nga makitid ong ulo ag buing nga nagasiling: “Kon indi ako makahangop, indi ako magpati!” Ang pagkakita ag ong pagtuo masami indi ‘compatible’ sa isya ag isa. Kay laban laban nga owa man kita gyapon et pagtuo bisan nakita ta un ong tanan nga ebidensya. Ong pagtuo nga nagapakilimos et pruweba pareho et pagtuo nga nasandig lamang sa pamatyagan, tanda, ukon milagro. ‘Granted’ nga dya nga pagtuo may daon man nga pagpati, apang dya nagakadula ukon nagalipas man lang kon ong mga ebidensya indi naman makita. Buot silingon, owa kara ginatao ong mabakod nga pundasyon et pagtuo nga dapat naton ipatungod sa Dios.
Si San Agustin nagsiling: “Ong pagtuo amo ong pagpati et mga butang nga indi ag owa naton makita, ag ong padya et kara nga pagtuo amo ong pagkakita et aton ginapatihan.” Gani kinahanglan gid naton ong pagtuo kay Kristo ag sa ana Pagkabanhaw, bisan daon un ong tanan nga ebidensya. Tani ong aton pagtuo kanana owa gid et pagpangduhaduha.


FR. DODO