4th Sun-Easter B

MAAYO NGA MANUGBANTAY

Ang isa sa mga pinakamatahum nga “imahen” nga ginpakita sang aton Ginuo sa aton amo nga Siya amo ang “Maayo nga Manugbantay”, kag indi katulad sang mga “sinuhulan” nga mga manugbantay nga nagapalagyo ukon uyaya sa ila nga obligasyon, Siya nakakilala sang tagsa niya ka panong kag indi gid magbiya sa ila, sa bagay nga kon may madula gani, bisan isa lamang, Siya indi gid mag-untat sa pagpangita tubtub nga Iya nga makita ini. Ang isa ka Maayo nga Manugbantay handa sa paghalad sang Iya kaugalingon para sa Iya nga panong. Ini naangut sa ginsiling sang aton Ginuo :”Nga wala na sang may mas maglabaw sa paghigugma sang isa ka tawo, sang sa paghalad niya sang iyang kabuhi para sa iya mga abyan!”- Amo ini ang pag-higugma sang isa ka Maayo nga Manugbantay.
Sa aton nga panahon karon, kita gina-agda sa pagtulok sining imahen sang Maayong Manugbantay agud aton mausisa sing maayo ang aton mga kaugalingon. Madamo sa aton karon nga luyag magprobitsar, apang wala man naga-alagad sang insakto...madamo sa aton ang yara sa palangaku-an nga nagpangako nga mag-alagad apang kon yara na sila sa ila puwesto, sila na ang gina-alagaran! Pila ang yara sa aton tunga ang ginakabig naton nga manugbantay apang sila gali sa minatu-od BANTAY-SALAKAY= Ginabantayan lang nga wala ka makatalupangud kag dayon salakayon ka sa wala mo ginapa-abut! Pila sa aton ang matuod nga NAGA-ALAGAD kag NAGAHIGUGMA katulad sang isa ka Maayo nga Manugbantay?
FR. RONNIE
“PASTOR”

May daywa ka sahi et manugbantay et karnero. Daon ong INDI MAAYO – ong mga “sinuholan”. Sang una pa, ginatumod un sanda et mga propeta: nagaribok sanda kontra sa Ginuo (Jer.2,8); nagainum sanda et gatas, nagabayo sanda et lana, ag nagaihaw et matambok nga karnero, apang wala nanda ginaatipan ong mga panong (Eze 34,3); wala sanda nagabatyag para sa mga panong (Zac 11,4-8).
Sa pihak nga bahin, daon ong mga MAAYO. Labi sa tanan, ong Dios ginatawag nga manugbantay et ana katawhan (Sal 23,1; Is 40,11) Ong Israel, ong pinili nga banwa, ginatawag nga panong et Dios (Sal 74,1). Sa mga pinuno et Israel, daon si Moises nga ginatawag nga manugbantay et Israel (Is 63,10) Amo man si Haring David nga ong ginalauman nga Mesiyas magagikan sa ana linahe (Sal 78,70-72; Miq 5,3). Ong maayo nga manugbantay nagatuytoy et panong sa madabong nga halalban ag sa higad et matin-aw nga tubig (Sal 23). Ginaamligan nana ong mga karnero sa matarong nga taguipusoon ag ginatatap ag ginatuytoyan sanda paagi sa sampaton nga kamot (Sal 78,72). Bilang maayo nga manugbantay, si Jesus nagatao et ana kabuhi para sa ana panong.
May daon nga estorya nga nagasaysay nahanungod sa isa ka panong et mga karnero nga nagpanaw ag nagpinangita sa anda pastor. Dayon sanda ginsingganan, “Sorry gid pero ong inyo pastor, pareho man et iban, nagpapanaw et anda panong sa pagpangita et anda kaugalingon nga halalban, ag manakarya, ato sanda sa bar, nagapinalilong ag nagapinaditol kon sin-o kananda ong pinakamaayo nga pastor.”
Gani kon ikaw isa ka manugbantay, maayo ka bala o indi maayo?
Mabuhay ong Maalwan nga mga Mambusaonpn!


FR. DODO