3rd Sunday of Advent (B)

ANG ATON TINGUG
Isa sang mga pinakamanami nga regalo sang Diyos nga ginhatag sa aton kaupod sa bugay sang kabuhi amo ang aton “TINGUG”. Sa aton tingug, kita nababati-an… kita nahahangpan… kita makahimo sang pagdayaw ukon makapahayag sang aton nabatyagan sa sulud sang aton nga kasing-kasing.

Importante ang aton tingug tungud diri naton ginapasad ang mga relasyon sa diin kita nagakabuhi nga may paghangpanay. Ini kon ang aton tingug ginagamit suno sa plano kag ginbuko sang Diyos. Apang kon ang aton tingug gamiton sa tiko kag mala-in nga katuyu-an, ini makadala sang halit nga mas kapin pa sang sa halit sang pisikal nga kasakitan nga aton gina-angkon. Ginasiling gani nga “maayo na lang nga kita masamaran sa aton panit, kay ini nagapali; apang kon kita masamaran tungud sa aton mga pulong nga ginpakawas sang aton tingug, ini indi mahapus malipatan… ini padayon nga nagatapik sa aton pagkatawo, kag wala naga-ayo bisan pa sa mahaba nga tini-on.

Sa Biblia ginasiling nga “ang aton dila katulad sang isa ka espada nga duha ang sulab! Sarang ini makahalit sa sulud kag sa gwa sang tawo!”, kag si Santiago nagpahayag nga “ang dila katulad sang isa ka “timon”, kagamay nga bahin sang barko, apang sarang ini makahatag sang direksyon sa amo nga sakayan (Jas 3:4)”. Ini nagahulugan lamang nga dapat kita magma-inandamon sa tagsa ka hala nga aton ginapakawas paagi sa aton tingug kay ini sarang makabulig ukon makahalit!

Ang aton tingug dapat mangin instrumento sa pagdayaw sa Diyos kag pagtahud sa aton isigkatawo! Sa diin bala naton ginagamit ang aton tingug? Sa pagdala kaayohan o sa paghalit?
FR. RONNIE