2nd Sunday of Advent (B)

UBI MAJOR, CESAT MINOR!
Ang aton tigulo sini nga mensahe karon, ginkuha sa ni-Latin nga pulong nga kon aton lubaron sa aton linggwahe nagakahulugan… “Kon ara ang mas mataas, dapat magsunud ang manubo…” Ukon “ Kon ara ang manunudlo, dapat magsunod ang bumulutho!” Madamo ini sang kahulugan nga nagapatuhoy sa isa ka kamatu-oran nga nagasiling nga kon ara ang “agalon” ang “sulugu-on dapat magpa-ubos!

Ayhan amo man ini ang nabatyagan ni Juan Bautista sa aton pagpamalandong sa ika-duha nga Dominggo sang Adbiento! Nahangpan niya sang maayo ang iya nga hilikuton kag papel sa pag-abut sang Mesias, nga siya indi ang ginapa-abut sang mga tawo nga Manluluwas, kundi siya isa lamang ka tiglawas nga ginpadala sang Diyos nga maghanda sa pag-abut sang Manluluwas sang kalibutan.

Madamo kaayo ang mga tawo nga nagsunud sa iya kag nagbaton sang iyang pangagda sa paghinulusol. Kon sa aton pa, si Juan Bautista madamo na sang mga “fans” tungud sang iya pagpangwali nga wala sing ginapasuna-id, kundi ini tampad sa pag-confrontar sang kamatu-oran sang kabuhi sang tagsa-tagsa. Apang bisan pa nga siya “sikat” sa panulok sang mga tawo, wala “maghabok” ang iya nga ulo sa bugal sa pag-angkon sang kadungganan nga siya amo ang ginapa-abut nga Mesias. Sa baylo, siya nagsiling nga “Ang magakari nga ulihi lang sa akon mas gamhanan pa sa akon…”

Ini nga PAGPA-UBOS ni Juan Bautista naga-agda man sa aton nga mangin mapa-inubuson. Usisa-on kag tan-awon naton ang aton kaugalingon kon bala kita matu-od nga mapa-inubuson ukon nagahari sa gihapon ang bugal sa aton kabuhi?
FR. RONNIE