22nd Sun. (Ord. Time) Year A

ANG KARITON SANG KABUHI

May isa ka hulubaton sang mga katigulangan nga nagasiling: “Ang kabuhi, daw isa ka kariton nga nagati-ug: Kon kaisa ara sa ibabaw, kon kaisa ara sa idalum.” Ayhan ini ginasambit sang mga katigulangan tungud ini nga kamatu-oran ila na na-agihan sa ila nga kina-andan nga pagkabuhi. Ginagamit gani ini nga kamatu-oran bisan pa sa mga ambahanon katulad sang “Gulong nga palad.”
Duna sa aton, nga ang tagsa-tagsa sa sining dutang luhaan, naga-agi sa sini nga halintang sang kabuhi. Bisan ang aton Ginuong Jesus, wala mahilway sa sini nga kamatu-oran. Pagkatapos nga Siya ginpahayag ni Pedro nga Siya amo ang Mesiyas nga ginpadala sang Diyos nga buhi, nga dapat pagahimaya-on kag dayawon, ang aton Ginuo nagpanagna dayon sang Iya malapit nga kamatayon– ang putuk-putukan sang Iya nga misyon!
Madamo sa aton ang nakatilaw sang kahamungaya-an sa aton kabuhi, nga daw sa puro lang himaya ang aton gina-agum, apang sa isa lang ka pamisuk, ini nga kalipay, ginabayluhan sang tuman nga kasakit kag kasubo. Ato na kuntani kita sa ibabaw, apang sa hinali lang, ginbutong kita pa-idalum tungud sang mga palaligban nga nagtuhaw.
Nakahangup ang aton Ginuo sa “kariton sang aton kabuhi” tungud Siya nag-agi man sini nga halintang. Magpalapit kita sa Iya sa tion sang palaligban o kahamungaya-an kay Siya nagapanglakaton upod sa aton.