TRINITY SUNDAY

SANTISIMA TRINIDAD (A)
Jn 3:16-18

Sa kapiestahan Solemne sang Santisima Trinad naga-atubang kita sa labing madalum nga “MISTERYO” sang Diyos bilang isa sang “panimalay” sang mga personas, Amay, Anak, kag Espiritu Santo sa diin may yara nga kalinong, paghigugma, kag paghida-it.” Kon ano ang relasyon sini nga misteryo sa aton kabuhi, ayhan makita naton sa pagpamalandung sa mga pulong sa Santos nga Kasulatan nga nagasiling nga “kita mga anak sang Diyos nga Amay nga nagahigugma sa aton, nga nagpadala sang Iyang Anak nga si Jesus nga mangin aton utod kag nagpakamatay sa aton, nga amo ang nagpadala sang Espiritu Santo nga amo ang aton abyan, mananabang kag kabakud sa tion sang mga kabudlayan sa aton kabuhi!” Ang Santisima Trinidad isa ka pangagda sa aton sa pagtukib kag pagpadalum sang aton nga relasyon sa Mahal nga Diyos kag sa aton kaugalingon sa kasanag sang Ebanghelyo nga nagatudlo sa aton nga “kon kita gintuga suno sa laragway kag nawong sang Diyos”, dapat maghimud-os kita nga mangin katulad Niya sa aton masarangan, tungud amo ini ang katumanan sa aton handum nga mangin kaupud sang Diyos kag sa paglantaw sa Iya nga nawong.

Ining pagkilala sang aton matuod-tuod nga dignidad bilang mga anak sang Diyos isa ka daku nga hilikuton tungud ini nagakahulugan sang aton pagpanibag-o kag pagliso sing bug-os para sa aton Ginuo… dapat naton isikway ang mga kalibutanon nga mga huyog sang aton lawas nga nagahigut sa aton sa sining kalibutan. Ang aton paghi-usa sa isa ka Diyos nga may tatlo ka personas, naga-agda sa aton sa pagpasulabi sang aton nga kaangtanan sa Iya labaw sang sa aton iban nga mga kaangtanan, ilabi na gid ang mga material nga mga bagay katulad sang tawohanon nga gahum, kwarta, kag kadayawan! Ang kaalwan sang Amay nga nagpadala sang Iyang Anak nagapangibabaw sa tanan nga sahi sang kahakug kag pagkamaiya-iyahon!

Ang Diyos amo ang pinakamadalum nga misteryo sa aton kabuhi, kag bilang Diyos sang kaluoy kag paghigugma, Siya naga-agda sa aton paagi sa Iyang Anak nga mag-alalangut kita bilang isa ka panimalay. Tungud Siya naghigugma sa aton, kita man gina-agda nga maghigugma sa isa kag isa agud mabalay ang katilingban sang Iyang mga anak nga nagakabuhi sa gugma.

Sugud sa aton pagbataon sang Sakramento sang Bunyag sa ngalan sang Amay, Anak, kag Espiritu Santo, naghimo kita sang “sinumpaan” nga ang aton mga buhat mangin tima-an sining presensya sang Santisima Trinidad nga igapalapnag naton sa bug-os nga kalibutan, kag sa ulihi kita mahi-usa sa amo man nga Diyos kaupud sa Iya katilingban tubtub sa walay katubtuban!

Kabay nga ining kapiestahan magtulud sa aton sa pagbalay sang matuod nga kalingban sang Diyos sa aton tunga sa diin may yara nga kalinong, paghigugma, kag paghidait!