PAGKUNSAD SANG ESPRITU SANTO

PENTECOST SUNDAY

(Jn 20: 19-23) A

May 11, 2008

Ginasaulog naton karon ang kapiestahan sang Pagkunsad sang Espiritu Santo sa mga apostoles. Ini nga Kapiestahan nagakahulugan sang “pagkatawo” sang Simbahan tungud sa Dominggo sang Pagkunsad ang isa ka “lapsag” nga Simbahan ginbun-ag sa diin sya magatuman sang iya nga hilikuton sa PAGMISYON!

Ginasiling sang Santos nga kasulatan nga samtang nagapangamuyo ang mga gintutun-an kaupod ni Maria Santisima didto sa hulot sa ibabaw, may isa ka mabaskug nga hangin nga naghuyup kag ang Espiritu Santo nagkunsad nga daw sa dila sang kalayo sa tagsa-tagsa sa ila nga nagbaylo sang ila katugnaw kag katalaw sa isa ka mas maisug nga mga tawo nga nagkadto sa tunga sang mga dalan kag wala’y hadluk-hadluk nga nagbantala sang maayong balita sa ila mga abyan kag bisan pa sa mga nagahingabut sa ila.

Ining hitabo sang kaisug wala lamang matabo sadtong Dominggo sang Pagkunsad, kundi sugud sadto, ang Espiritu Santo padayon nga naga-upud kag naga-ubay sa Iya nga Simbahan nga Siya amo ang ginagikanan sang kusug sa pagtuy-toy, sa pag-alungay kag sa pag-giya sang iya nga dalan.

Ining buluhaton sang Espiritu Santo padayon tubtub sa aton nga panahon kag maathag nga ginapakita paagi sa aton pagbaton sang Sakramento sang Pagbunyag. Paagi diri ginatanum ang binhi sang pagtuo sa aton tagipusu-on nga nagadala sa aton sa isa ka mahigugma-on nga relasyon sa Mahal nga Diyos, nga naga-agda sa aton bilang iya mga inayupan nga mga anak. Ang Dominggo sang Pagkunsad kag pag-abut sang Espiritu Santo amo si Hesus nga nagabantala nga ang Diyos nga Amay naghatag sang Iya nga ginhawa sa aton agud makaambit kita sang isa ka kabuhi nga Diyosnon. Ang langit sarang na naton “maabut” apang ang ginharian sang langit indi naton maangkon kon inidi kita magmangin-handa sa pagpanibag-o kag maghatag sang duog sa Espiritu Santo nga magpuyo sa aton kaugalingon. Gani, bilang pagsugud sa pagbaton sang dulot sang Espiritu Santo dapat naton papag-unon ang aton kabuhi sang pagpangamuyo nga amo ang magabutang sa aton sa isa ka mahigugma-on nga pagtamud sang Diyos. Aton talupangdon sa Ebanghelyo nga ang Espiritu Santo nagkunsad sa mga apostoles sa tion nga sila NAGAPANGAMUYO! Kon wala ini, mabudlay kaayo nga mahangpan naton ang mga bugay sang Espiritu Santo sa diin kita ginatawag sa pagpakig-ambit sa misyon sang Simbahan. Kon aton matalupangdan ini nga mga bugay, aton mahatagan sing katumanan ang aton mga hilikuton bilang mga katapo sang Isa ka Lawas sang aton Ginuo sa Iya nga Simbahan.

Ang maragtas sang Pagkunsad isa ka pangagda sa aton sa pagpamalandung sang aton katampad sa Ginuo kag kon ano kita ka bukas sa ginabubu nga mga bugay sang Espiritu sa aton kabuhi. Sa kasaku-on sang aton kabuhi subong, may mga tin-on pa bala kita nga ginahatag sa aton Ginuo sa pagpangamuyo? Sa aton pagpangamuyo ginapamalandungan man bala naton kon paano naton mapaambit ang mga bugay nga aton nabaton gikan sa Diyos? Kabay nga ang Espiritu Santo magtuy-toy kag magpabakud sa aton.