TRINITY SUNDAY

SANTISIMA TRINIDAD (A)
Jn 3:16-18

Sa kapiestahan Solemne sang Santisima Trinad naga-atubang kita sa labing madalum nga “MISTERYO” sang Diyos bilang isa sang “panimalay” sang mga personas, Amay, Anak, kag Espiritu Santo sa diin may yara nga kalinong, paghigugma, kag paghida-it.” Kon ano ang relasyon sini nga misteryo sa aton kabuhi, ayhan makita naton sa pagpamalandung sa mga pulong sa Santos nga Kasulatan nga nagasiling nga “kita mga anak sang Diyos nga Amay nga nagahigugma sa aton, nga nagpadala sang Iyang Anak nga si Jesus nga mangin aton utod kag nagpakamatay sa aton, nga amo ang nagpadala sang Espiritu Santo nga amo ang aton abyan, mananabang kag kabakud sa tion sang mga kabudlayan sa aton kabuhi!” Ang Santisima Trinidad isa ka pangagda sa aton sa pagtukib kag pagpadalum sang aton nga relasyon sa Mahal nga Diyos kag sa aton kaugalingon sa kasanag sang Ebanghelyo nga nagatudlo sa aton nga “kon kita gintuga suno sa laragway kag nawong sang Diyos”, dapat maghimud-os kita nga mangin katulad Niya sa aton masarangan, tungud amo ini ang katumanan sa aton handum nga mangin kaupud sang Diyos kag sa paglantaw sa Iya nga nawong.

Ining pagkilala sang aton matuod-tuod nga dignidad bilang mga anak sang Diyos isa ka daku nga hilikuton tungud ini nagakahulugan sang aton pagpanibag-o kag pagliso sing bug-os para sa aton Ginuo… dapat naton isikway ang mga kalibutanon nga mga huyog sang aton lawas nga nagahigut sa aton sa sining kalibutan. Ang aton paghi-usa sa isa ka Diyos nga may tatlo ka personas, naga-agda sa aton sa pagpasulabi sang aton nga kaangtanan sa Iya labaw sang sa aton iban nga mga kaangtanan, ilabi na gid ang mga material nga mga bagay katulad sang tawohanon nga gahum, kwarta, kag kadayawan! Ang kaalwan sang Amay nga nagpadala sang Iyang Anak nagapangibabaw sa tanan nga sahi sang kahakug kag pagkamaiya-iyahon!

Ang Diyos amo ang pinakamadalum nga misteryo sa aton kabuhi, kag bilang Diyos sang kaluoy kag paghigugma, Siya naga-agda sa aton paagi sa Iyang Anak nga mag-alalangut kita bilang isa ka panimalay. Tungud Siya naghigugma sa aton, kita man gina-agda nga maghigugma sa isa kag isa agud mabalay ang katilingban sang Iyang mga anak nga nagakabuhi sa gugma.

Sugud sa aton pagbataon sang Sakramento sang Bunyag sa ngalan sang Amay, Anak, kag Espiritu Santo, naghimo kita sang “sinumpaan” nga ang aton mga buhat mangin tima-an sining presensya sang Santisima Trinidad nga igapalapnag naton sa bug-os nga kalibutan, kag sa ulihi kita mahi-usa sa amo man nga Diyos kaupud sa Iya katilingban tubtub sa walay katubtuban!

Kabay nga ining kapiestahan magtulud sa aton sa pagbalay sang matuod nga kalingban sang Diyos sa aton tunga sa diin may yara nga kalinong, paghigugma, kag paghidait!

PAGKUNSAD SANG ESPRITU SANTO

PENTECOST SUNDAY

(Jn 20: 19-23) A

May 11, 2008

Ginasaulog naton karon ang kapiestahan sang Pagkunsad sang Espiritu Santo sa mga apostoles. Ini nga Kapiestahan nagakahulugan sang “pagkatawo” sang Simbahan tungud sa Dominggo sang Pagkunsad ang isa ka “lapsag” nga Simbahan ginbun-ag sa diin sya magatuman sang iya nga hilikuton sa PAGMISYON!

Ginasiling sang Santos nga kasulatan nga samtang nagapangamuyo ang mga gintutun-an kaupod ni Maria Santisima didto sa hulot sa ibabaw, may isa ka mabaskug nga hangin nga naghuyup kag ang Espiritu Santo nagkunsad nga daw sa dila sang kalayo sa tagsa-tagsa sa ila nga nagbaylo sang ila katugnaw kag katalaw sa isa ka mas maisug nga mga tawo nga nagkadto sa tunga sang mga dalan kag wala’y hadluk-hadluk nga nagbantala sang maayong balita sa ila mga abyan kag bisan pa sa mga nagahingabut sa ila.

Ining hitabo sang kaisug wala lamang matabo sadtong Dominggo sang Pagkunsad, kundi sugud sadto, ang Espiritu Santo padayon nga naga-upud kag naga-ubay sa Iya nga Simbahan nga Siya amo ang ginagikanan sang kusug sa pagtuy-toy, sa pag-alungay kag sa pag-giya sang iya nga dalan.

Ining buluhaton sang Espiritu Santo padayon tubtub sa aton nga panahon kag maathag nga ginapakita paagi sa aton pagbaton sang Sakramento sang Pagbunyag. Paagi diri ginatanum ang binhi sang pagtuo sa aton tagipusu-on nga nagadala sa aton sa isa ka mahigugma-on nga relasyon sa Mahal nga Diyos, nga naga-agda sa aton bilang iya mga inayupan nga mga anak. Ang Dominggo sang Pagkunsad kag pag-abut sang Espiritu Santo amo si Hesus nga nagabantala nga ang Diyos nga Amay naghatag sang Iya nga ginhawa sa aton agud makaambit kita sang isa ka kabuhi nga Diyosnon. Ang langit sarang na naton “maabut” apang ang ginharian sang langit indi naton maangkon kon inidi kita magmangin-handa sa pagpanibag-o kag maghatag sang duog sa Espiritu Santo nga magpuyo sa aton kaugalingon. Gani, bilang pagsugud sa pagbaton sang dulot sang Espiritu Santo dapat naton papag-unon ang aton kabuhi sang pagpangamuyo nga amo ang magabutang sa aton sa isa ka mahigugma-on nga pagtamud sang Diyos. Aton talupangdon sa Ebanghelyo nga ang Espiritu Santo nagkunsad sa mga apostoles sa tion nga sila NAGAPANGAMUYO! Kon wala ini, mabudlay kaayo nga mahangpan naton ang mga bugay sang Espiritu Santo sa diin kita ginatawag sa pagpakig-ambit sa misyon sang Simbahan. Kon aton matalupangdan ini nga mga bugay, aton mahatagan sing katumanan ang aton mga hilikuton bilang mga katapo sang Isa ka Lawas sang aton Ginuo sa Iya nga Simbahan.

Ang maragtas sang Pagkunsad isa ka pangagda sa aton sa pagpamalandung sang aton katampad sa Ginuo kag kon ano kita ka bukas sa ginabubu nga mga bugay sang Espiritu sa aton kabuhi. Sa kasaku-on sang aton kabuhi subong, may mga tin-on pa bala kita nga ginahatag sa aton Ginuo sa pagpangamuyo? Sa aton pagpangamuyo ginapamalandungan man bala naton kon paano naton mapaambit ang mga bugay nga aton nabaton gikan sa Diyos? Kabay nga ang Espiritu Santo magtuy-toy kag magpabakud sa aton.

ASCENSION

Note: Due to the needs of the local clergy, I will be publishing my reflections in the dialect (Ilonggo) version. Hope this will be helpful to my brothers in the ministry. Thanks a lot!

PAGKAYAB SANG GINUO

(May 4, 2008)

Ang paghamulag sa hinigugma indi sang mahapus, kag isa ini ka bagay nga wala naton maandan. Ang pagkayab sang aton Ginuo nagakahulugan sang pagtakup sang Iya nga misyon sining kalibutan kag sang Iyang mahimayaon nga pagbalik sa Iyang Amay. Natuman na Niya ang Iya nga buluhaton sa diin Siya ginpadala. Samtang nagatunog ang mga trumpeta sa kalangitan sa pag-abut sang aton Ginuo, ayhan ang mga apostoles sa pihak nga bahin nagabatyag sang tuman nga kasubo sa Iyang pagtaliwan. Apang ang katapusan nga mga pulong sang aton Ginuo nagasiling, ‘Mangin kaupud ninyo ako sa tanan na tion. Maglakat kamo kag magbantala sang Maayong Balia sa tanan nga mga kapungsoran.’ – puno sang paglugpay apang nagapanawag sang maabtik nga pagsabat! Wala sila ginpabay-an sang aton Ginuo apang ginahatag Niya sa ila ang Iya nga misyon sa paghimo sang paghigugma sang Diyos nga mahibalu-an sang tanan paagi sa ila di-maisip nga paghigugma kag pag-alagd sa ila isig-katawo. Ang ‘pagkadula’ sang aton Ginuo nagatulud sa mga apostoles sa pagpangatubang sang pala-abuton nga may kaisug. May daku sila nga buluhaton sa pagpalapnag sang kaluwasan nga ginda-ug ni Kristo didto sa kalbaryo, sa pagbag-o sang kamatayon sa isa ka bag-o nga kabuhi! Indi na mangin kaupod sang mga apostoles si Kristo sa Iya tawohanon nga pagpakig-upod kundi Siya mangin kaupod nila paagi sa Espritu Santo nga amo ang ila mangin gabay kag kabakud samtang sila nagapanglakaton sa sining kinabuhi.

Kon atnn nga pamalandungan ining daku nga kapiestahan karon, aton matalupangdan kon ano kadaku ang pagsalig sang Diyos sa aton, tungud ang pagkayab nagapahayag kon ang ATON DAPAT BUHATON agud mangin kaupud naton si Kristo sa wala’y katubtuban. Kon sa diin Siya nagkadto, didto kita nagalaum nga maga-upud! Katulad sang mga apostoles yari kita sa sentro sang entablado sang kabuh kag ang panawagan sa aton amo ang pag-alagad. Yari kita diri agud sa pagpadayon sang binuhatan sang mga apostoles kag sa pagpadayon a pagpaluntad sang ginharian sang Diyos. Sa kalibutan nga ginalikupan sang kadulum kag kasubo, kita ginatawag sa paghatag kasanag kag kalipay. Ayhan ang aton kabuhi mangin isa ka libro sa diin sarang makabasa ang mga tawo sang Maayong Balita. Ang aton pagkabuhi mangin mabaskug nga mensahi sang sa aton ginahala ukon ginabantala. Nagasalig sa aton ang Ginuo. Ang aton pangamuyo amo nga bag-uhon Niya kita paagi sa buhat sang Espiritu Santo agud aton mahibalu-an ang kamatuoran kag may kabakud kita sa pagbuhat sang maayo.

Ang pagkayab nagahangkat sa aton sa pagpadayon sang ginsuguran sang aton Ginuo. Ano bala ang aton ginbuhat para sa Iya?