20th Sunday Ord. Time (A)

MAAYO AKO IYA SANG SA IBAN!
Ang aton nga Ebanghelyo subong nagapakita sa aton sang isa ka sitwasyon sa diin ginapahayag ang “kultura” nga nagaluntad sa panghuna-huna sang mga Hudiyo. Ang aton Ginuo nakaabut sa duog sa “guwa” na sang Judea, sa kadutaan sang Tiro kag Sidon nga yara malapit sa “distrito” sang Canaan. Sa bagay nga ang babayi nga nagpalapit sa Iya taga-Canaan man.
Suno sa malawig nga maragtas sang mga taga-Israel, ang “linahi” sang mga taga-Canaan isa ka linahi nga “mahigko” tungud ang ila mga katigulangan, nagsimba sa mga diyos-diyos! Sa mata sang mga Israelinhon, sila nagdagta sang ila nga kaangtanan sa Diyos ni Abraham, Isaac, kag ni Jacob! Sa bagay nga sa “expression” sang mga Judeo, ang mga tawo nga nagapuyo sa mga duog nga katulad sang Canaan, ginakabig nga “sapat”, partikularmente “mga ido”. Amo gani nga ini nga “expression” gingamit sang aton Ginuo sa nagpalapit nga babayi nga nagapangayo sang bulig sa Iya: “Indi nagakabagay nga kuhaon ang pagkaon sang mga kabataan kag ihaboy sa mga ido.”- Ini pagpahayag sang panghuna-huna nga nagaluntad sa mga Israelinhon nga sila lang ang “pinili nga rasa” sang Diyos. Sila lang ang “favored people” sang Diyos!- Sila lang iya ang mayad! Masami amo man kita sini, indi bala? Mayad kita magkumparar sang aton kaugalingon sa mas menos-menos sang sa aton!
Ayhan, isa ini ka masakit nga “insulto” para sa aton mga pamatin-an, apang indi para sa sini nga babayi. Wala siya magreklamo sa sini nga “pagpasipala” tungud ayhan, GINBATON niya sa iya kaugalingon nga matuod, may sayup gid man ang ila mga katigulangan. Sa baylo, iya gingamit ini bilang “argumento” sa PAGPAUBOS sang iya nga kaugalingon, lamang nga iya madala sa atubangan sang Ginuo ang iya nga kinahanglanon.
Nakita sang aton Ginuo ang iya nga “pagtuo” kag tungud sini Iya man ginpahayag ang isa ka “BAG-O” nga painu-ino– nga sa Diyos, WALA SANG PINASULABI– ang tanan Iya nga ANAK!
FR. RONNIE