5th Sunday of Easter (A)

INDI KAMO MAGPALIBOG!
Isa sa nagapadasig sa aton nga “magtigulang”, suno sa mga nakasiyasat sini nga bahin sang aton pagkatawo, amo ang mga nagatublag sa aton nga mga PALALIGBAN. Kon pirmi lang kita nagapalibog, madali magkuryanot ang aton mga agtang… madali magputi ang aton mga buhok… madali kita mag- pangluya, tungud kay indi na kita makapahuway sang maayo.
Amo ini ang ginasaad subong sang aton Ginuo sa aton nga Ebanghelyo. Indi kita dapat magpalibog, kundi dapat kita MAPAHAMTANG, tungud Siya amo aton kalig-onan! Kon yara Siya, wala sang may makadaog sa aton nga palaligban. Sa Iya gid lang kita wala pagtalang, tungud Siya amo ang DALAN, ang KAMATUORAN, kag ang KABUHI! Siya nagapromisa sang isa ka duog sa diin kita makaambit sang kabugana-an sang kabuhi kaupod sa Iya nga Amay sa Iya nga ginharian.
Amo ini ang aton ginahandum tanan… ang pag-angkon sang kalipay nga nagapabilin. Masubo lang nga aton matalupangdan ang aton kaugalingon nga sa masami nagapangita kita sini nga kalipay sa lain nga dalan- sa dalan sang umalagi nga kalibutan sa diin ang tanan madali nga naga-agi ukon nagalipas lamang. Pun-on mo man sang alahas ang imo lawas… naga-awas-awas man ang imo kwarta sa bangko… malapad man ang imo kadutaan… madamo man ang imo mga pagkabutang, apang sa gihapon, imo mabatyagan may yara gihapon nga kulang sa imo ginapangita nga kalipay. Masami imbes nga ini magahatag sa imo sang kalipay, ini pa gani ang nagahatag sa imo sang kapin nga palaligban!
Siling ni San Agustin: “My soul is restless until it rests in God!” Si Jesus amo ang aton TUNAY nga KALIPAY!

FR. RONNIE

PIHO NGA DALAN
“Sa kilid et karsada, sa isa ka bangga, may isa ka pastor ag pari nga nagahawid et isa ka karatula nga nagasiling: “MADALI UN LANG ONG KATAPUSAN. MAGLISO UN KAMO AGUD INDI KAMO MAGLUMPAT SA INYO KALAGLAGAN.” Dayon may naglabay nga sobra kadasig nga kotse nga puno et magkaberks nga nagadinaskal ag nagasininggit. Ginhibaygan nanda ong pari ag pastor ag ginsuyaan: “Hoy! Mga salimpapaw nga mga reliyoso. Owa kamo et labot kanamon. Pabay-i nyo lang kami…” Owa pa nanda matapos ong anda pagyaguta sa pari ag pastor sang mabatian ong tunog et pag-igot et mga goma ag ong hanggud nga “splash” sa tubig. Dayon ong pari naghambal sa pastor: “Ano abi sa imo Bro.? Lainon ta un lang guro ong aton pahisayud. Isulat ta un lang gid nga: “GUBA ONG TULAY. MAG-UNTAT UN KAMO AG DURI MAG-AGI SA CROSSING.”
Kon ikaw dabi daon sa isa ka lugar nga owa mo pa gid nakadtuan ag ikaw nagpangayo et “direksyon” sa isa ka tawo. Dayon ong tawo nagtudlo sa imo: “Diretso ka lang sa ikaywa nga crossing ag dayon liko ka ag dayon maglibot ka sa landmark ag diretso, dayon liko sa ikalima nga block ag….” Piho nga matalang ka gid. Apang kon ong tawo nga imo ginpamangkutan magsiling sa imo: “Dali! Dal-on ko ikaw didto!” Sa kaon nga punto, ong tawo amo gid mismo ong imo ‘alagyan’ ag makasampot ka gid sa imo kaladtuan. Amo dya ong punto et ginhambal ni Kristo sa Ebanghelyo. Owa lang sia nagatudlo o nagapaditol et alagyan, kamatuoran ag kabuhi. SIA gid MISMO ong Dalan, Kamatuoran ag Kabuhi padulong sa Amay. Kon owa sya, indi gid kita makasampot sa langit.
Mabuhay ong Maalwan nga mga Mambusaonon!
FR. DODO