Pentecost (B)

ANG ESPIRITU– MANANABANG

Domingo subong sang Pentekostes– ang adlaw nga ginakabig sa aton selebrasyon sa Simbahan nga “Adlaw sang Pagbun-ag” sa iya, tungud sa sini nga adlaw ginbubo sa Simbahan ang grasya sang Espiriitu Santo– ang Espiritu sang Kamatuoran.
Ini amo ang ginsaad nga Mananabang nga igapadala sang aton Ginuo matapos nga Siya nagbalik sa Iya “lingkuran” didto sa langit sa Iya nga pagkayab. Amo ini ang katumanan sang Iya nga pangako sa Iya mga gintutun-an nga indi Niya sila pag-ibilin nga mga ilo, kundi Siya padayon nga maga-upod sa Iya nga Simbahan tubtub sa katapusan paagi sa presensya sang Espiritu Santo.
Ini nga Espiritu amo ang magapabakud sa ginsuguran nga simbahan o katilingban sang mga apostoles nga ginbilinan sang aton Ginuo sa pagpadayon sa pagpalapnag sang Maayong Balita sa tanan nga mga kapungsoran. Ini nga Espiritu amo ang magapa-isog sa mga “nagapalanago” kag mga “matalaw” nga mga apostoles sa pagkadto sa “mga dalanon” kag daw sa mga “hubog” (suno sa kay Propeta Joel) nga magabantala sang Maayong Balita sang Dios.
Paagi sa sining Espiritu sang kamatuoran, ang tanan nga kahadlok ginpu-as kag ginpanas. Sa baylo, ang mga gintutun-an nangin mapagsik kag wala’y-hadlok nga nagpanaksi paagi sa ila KABUHI sang Maayong Balita sang Diyos. Sa sini nga pagpanghikot sang Espiritu Santo, ang Simbahan nagpamukadkad sang isa ka bag-o nga kabuhi! HAPPY BIRTHDAY!


FR. RONNIE


ESPIRITU ET GUGMA

Ong dinaan nga estorya nahanungod sa Tore et Babel (Gn. 11:1-9) sa kadutaan et Shinar ukon Babylon nagapahangop kanaton kon ngaa ong mga tawo nagahala et mga nagakalainlain nga linggwahe nga indi maintiendihan et anda isigkatawo nga ISA man lang gani ong anda ginhalinan. Ag aton nasaydan nga ong nagtuga et karang sinamuryakot ag indi mahangpan nga hala et mga manug-obra et Tore amo ong anda nga sala, nga pareho sa sala nanday Adan ag Eba: GUSTO NANDA MANGIN PAREHO ET DIOS. Luyag nanda maglabaw sa anda limitasyon bilang mga GINTUGA lamang ag nagmatomato sa pagdesisyon kon ano ong maayo ag malain. Indi un nanda gusto magsalig sa anda Manugtuga.
Karon, ong kaluwasan naangkon lamang ni Kristo bangud et ana pagtuman sa kabubut-on et ana Amay bisan hasta sa kamatayon. Tungud et ana pagpaubos ag PAGBALIBAD nga mangin “pareho et Dios”, sya ginhimaya sa ana Pagkabanhaw. Ag ong Espiritu Santo amo ong nagapasanag et kara nga kamatuoran. Buot silingon, ong tanan nga mga tawo MAGAINTIENDIHANAY lang kon anda ilogon dyang ejemplo ni Kristo sa ana pagtao et lubos nga pagsalig sa ana Amay lamang ag indi sa ana kaugalingon nga ikasarang.
Ong Pentekostes nagaselebrar et ‘Birthday” et Simbahan, ong Kumonidad et mga Tumuluo. Kon sa aton pa, kita ginaagda sa PAGPATINDOG liwat – indi un et Tore et aton mga kaugalingon kundi et buhi ag aktibo nga ‘monumento’ o katilingban et Dios. Ag dya ong katilingban kon sa diin ong PAGHIGUGMA amo ong nagahiusa sa tanan nga mga katapu nga may nagkalainlain nga kolor, ginhalinan kag linggwahe.
Mabuhay ong Maalwan nga mga Mambusaonon!


FR. DODO