2nd Sunday of Easter (B)

PAGPADAYON SANG MISYON!

Ang plano sang Dios wala nagasugod sa ‘magarbo’ ukon dalagku nga mga bagay. Wala man ini nagasugod sa mga tawo nga puno sang ikasarang. Kon aton gid nga panilagan sang mayad, ang Dios gani nagpili sang mga tawo nga nagakilala sang ila kakulangan, kag nagasalig lamang sa iya… nagapali Sia sang isa ka pinakamagamay nga ‘binhi’ sang mostasa– ang pina-kadiutay nga binhi, agud nga magtubo ini kag maglambo, sa diin ang mga kapispisan makapamugad.
Ang pagbantala sang Maayong Balita ginhimo sang mga apostoles nga nagbiya kay Jesus sa Iya pasyon. Naglaum sila nga ang ‘Ginharian sang Dios’ magaabut sa mahimayaon nga paagi, gani daku gid ang ila kasubo kag kahadluk sang si Jesus gindakop kag ginkondenar. Wala sila makahangup sang gintudlo ni Jesus nga kinahanglan nga ang Mesiyas mag-antos kag mapatay, sa wala pa Sia ginhimaya.
Apang ang plano snag Dios labaw pa sa ginaplano sang tawo. Ang ‘pagkalutos’ sang mga apostoles wala nagatapos sang ila misyon. Si Jesus nga nabanhaw sa minatay nagpakita sa ila kag naghatag sing paghidait. Ginhatag man Niya sa ila ang Espiritu Santo agud mangin ila kaisug kag manugtuytoy.
Ini nga ‘pagpadala’ sa isa ka misyon sang pagbantala, padayon sa gihapon nga nagakahanabo sa kabuhi sang Simbahan. Kita amo ang mga bag-o nga gintutun-an sang aton Ginuo nga ginatawag sa pagpalapnag sang Iyang Maayong Balita sa tanan.


FR. RONNIE



IRIRIMAW SA PAGTUO

Isa ka Domingo nga aga, may tawo nga nagsulod sa Simbahan ag nagpungko sa una nga nakakalo. Sang nakita sya et sacristan, dya nagpalapit kanana ag nag-estorya ag dayon naghinyo kanana nga kon pwede bul-on nana ong ana kalo. Naghambal ong tawo: “Ow pasensya gid ha! Pero owa gid ko nalipat kara. Ginhungod ko gid gani nga magkalo. Kay sa daywa ka bulan nga sagad ko balikbalik sa kara nga Simbahan, owa gid et may nagatamyaw kanakon. Gani akon napanumdoman nga amo lang dya ong paagi agud may magsapak o may magbugno o may maestorya kanakon!”
Si Tomas owa sa “Upper Room”, ong lugar sa diin ong tanan nga mga gintutun-an nagtipon sa paglalaw sa anda namatay nga Ginoo. Sya nagpili nga magpangasubo nga ISAHANON LANG. Ag tungod nga owa sya nag-imaw kananda, owa nana nakita ong nasaksihan et tanan – Ong Nabanhaw nga Kristo. Duri ginatudlo kanaton ong Hanggud nga Importansya et PAG-IRIRIMAW ag PAGHILIUSA et mga Kristianos. Si Kristo daon sa ana Simbahan ag ong tagsa ka katapu kara maka-experiensya et labing maayo et ana presensya kon sanda tililingob ag dululungan nga nagapalapit kanana. Kay aton gid nasaydan nga ong Iglesya indi gid isa ka lugar kundi mga tawo; indi dya isa ka sagrado nga “building” kundi pagtililipon et mga tumuluo. Ong Simbahan IKAW nga nagapangamuyo, indi nga kon sa DIIN ikaw nagapangamuyo.
“May isa ka “Easter legend” nga nagasiling nga ong Ganhaan et Langit isa ka sobra ka isot nga alagyan nga ong NAGAISAHANON nga tawo indi gid makasulod duri. Ong daywa ka tawo nga nagabinuligay makakita et mahupos nga ‘entrance’. Pero kon pulo un ka bilog nga tawo nga nagahigugmaanay ong mag-abot, anda makita nga sobra tana kahanggud et ganhaan nga anda pagasudlan!” (Charles Brown)
Mabuhay ong Maalwan nga mga Mambusaonon!
FR. DODO