4th Sunday of Easter (A)

KILALA ANG TINGUG!

Sa pagkadamo sang mga karnero sa Israel, tungud ini isa ka pangabuhi-an nga indi lamang nagahatag sa ila sang kita, kundi tungud ini nagahatag sa ila sang kasulhayan sa ila pagpangabuhi, sa bagay nga ang paghuput sang karnero isa ka daku nga bahin sa ila adlaw-adlaw nga pagkabuhi.
Tungud sa masami, ang ginapahalban sang mga karnero isa ka “kumon” nga patag, nagaka-igo lang nga ang mga karnero may iya nga kaugalingon nga “password” nga ginhatag sang ila manugbantay, agud madali ang magtipon sa ila matapos sila makahalab sa ila halalban. Amo gani nga ginasiling sang mga nakasiyasat sini nga mga kinadayhon sang mga Israelinhon, nga ang tagsa ka manugbantay, may iya nga pinasahi nga panawag sa iya mga panong, katulad abi sang isa ka espesyal nga “panihol” ukon “tingug”. Ang indi sang bahin sina nga panong sang mga karnero, indi man makahangup sang pagtawag sang manugbantay.
Sa sini man nga painu-ino, ang aton Ginuong Jesus nagapahayag sang Iya buot silingon, nga bilang aton Maayo nga Manugabantay, Siya may Iya nga pinasahi nga panawag sa Iya mga sumulunod kag may pinasahi man Siya nga pagkilala sa ila.
Ining pinasahi nga pagkilal-anay amo ang nagahatag sang kahulugan sang aton kaangtanan (bilang panong) sa aton Ginuo (bilang aton Manugbantay). Siya nakakilala sa aton sang lubos sa bagay nga handa Siya sa paghalad sang Iya kaugalingon nga kabuhi agud malikaw kita sa mga halit sa aton kaugalingon. Siya ang Maayo nga Manugbantay kag handa magpakamatay sa aton nga Iya panong. Kilala Niya kita! Paano naton Siya ginakilala?


FR. RONNIE



MAAYO KA BALA NGA MANUGBANTAY?

Isa sa mga sinauna nga mga sala et katawhan amo ong “OWA LABOT”. Dya ginsugdan ni Cain nga, pagkatapos nana patyon ong ana utod nga si Abel, naghambal, “Salabton ko bala ong akon utod?” (Gen.4:9) Dya nga panugdaon hala un, sugod sadto, nga ginabalikbalik sa estorya et kalibutan et mga sungaksungak nga katawhan. Gani ong dugo ni Abel padayon man nga nagasinggit et bulig ag hustisya paagi sa mga tawo nga gintalikdan et anda owa et labot nga mga utod ag abyan.
Bilang sabat sa pagtiyabaw et mga makaluluoy nga mga biktima et ‘DEADMA’ ag pagpabulagbulag et katawhan, ong Dios nagpadala et mga MANUGBANTAY suno sa ana taguipusuon ag ginsaad. (Jer. 3:15) Ag ong pinakahalangdon sa karang mga manugbantay, owa un et iban pa, kundi si Jesukristo. Paagi kay Kristo, ong Maayo nga Manugbantay, ong mahigugmaon nga kaluoy ag kaayo et Dios nakaabot ag napabatyag sa mga tawo. Sa kay Kristo, ong Dios nagbantay sa ana mga tawo.
Apang pagkatapos ni Kristo, dyang hilimuon et pagbantay gintongtong sa aton nga mga abaga. Paagi sa aton bunyag, kita otomatik nga nagaugyon sa bulohaton ni Kristo sa pagbantay. Gani indi un kita dapat maghambal nga: “Salabton ko bala ong akon utod?” Kay sa pagkamatuod, salabton ta gid man tana ong isya ag isya. Kaangay kay Kristo, kita man dapat nga mangin Maayo nga mga Manugbantay, nga nagakabalaka, nagaulikid, nagatatap ag nagabulig sa anda.
Mabuhay ong Maalwan nga mga Mambusaonon!


FR. DODO