7th Sunday Ord. Time (A)

MANGIN… HIMPIT!
Sang ang aton Ginuong Jesus ang nag-interpretar sang layi, Iya ini ginhatagan sang bag-o nga kahulugan. Iya ginpahayag ang matuod nga “painu-ino” sang Amay. Ang layi indi lamang pagkuhaan sang base sa iya “minimo” nga talaksan nga amo ang “hustisya” kundi may malapad ini nga sadsaran nga amo ang “bugay kag paghigugma” sang Diyos.
Ang “daan” nga layi sang PAGTIMALOS, isa lamang nga “limitado” nga tikang sa pag-angkon sang kahusayan! Ano gid kon makabalos ka? Ano dayon? Ini magatuga lamang sang pagtimalos man sang imo nga ginbalusan. Gani ang matabo, BALUSAY– Balos-balos… wala sang katapusan. Sa ulihi nagatini-og-ti-ug nalang kita sa sistema sang isa ka kadena nga indi mabadbad!
Ang aton Ginuo naghatag sang isa ka sahi sang kabuhi (way of life) nga nagbag-o sang kahulugan sang layi sang pagtimalos. Ang layi nga mapiguson, nahimo nga gabay sang kabuhi sang paghigugma kag kaluoy! Para sa aton Ginuo, ang pagtuman sang layi indi mapuno paagi sa pagtimalos, kundi sa pamaagi lamang sa PAGHIGUGMA!
Ano bala ang nagahimo sang Kristiyanismo nga lain sang sa iban nga relihiyon sa bug-os nga kalibutan? Ini amo ang GRASYA ukon BUGAY sang Diyos– sa pagkabig sa aton isigkatawo INDI suno sa aton talaksan, kundi suno sa talaksan sang Diyos!- Ang Diyos maalwan sa maayo kag malain… sa mga balaan kag mga makasasala— tungud Siya HIMPIT! Bilang Iya mga anak kita man ginaagda nga mangin himpit!
FR. RONNIE
PAGKA-MAPINATAWARON
“Tani patawaron sya et Dios. Luyag ko nga mapalangit man sya!”, ong mga panaghoy ni Santa Maria Goretti, onse anyos nga unga, samtang ginabuno sya et isa ka 19-anyos nga pamatan-on.
Ong leksyon et aton Ebanghelyo owa un nagakinahanglan pa et duro nga “emphasizing”. Kon gusto naton mangin minatuod nga mga Kristiano, KINAHANGLAN NATON PATAWARON ONG NAKASAKIT O NAKASALA KANATON! Ngaman? “Kita nagapatawad tungod kita nagahigugma!”, siling ni Francois De La Rochefoucauld. Kinahanglan naton palanggaon ong tanan nga mga tawo, ong aton mga amigo ag bisan pa ong aton mga kaaway. Siling ni G. K. Chesterton: “Kita ginasugo sa paghigugma sa aton mga isigkatawo ag sa aton mga kaaway. Ag sanda palareho lang man nga mga tawo.”
“Isa ka adlaw, gindapal si Ton2 et ana magulang nga si Mac2. Gani sya naghibi ag nagdumot sa ana magulang. Sang sya manugkatyog un sa gab-I ag manugpangadi et ana “night prayers”, sya ginhutikan et ana mama, “Gusto ko nga patawaron mo anay si manong mo!” Apang owa sa modo si Ton2 nga magpatawad. Ong ana mama naghimo un et tanan nga klase et paglaygay ag pag-engganyo apang owa gid et epekto.
Sa katapusan, sya naghambal: “Ti ano karon kon ong utod mo mapatay manakara nga gab-I, indi ka bala pagkonsensyahon nga owa mo sya napatawad?” Daw sa natouch man ong isot nga taguipusuon ni Ton2, gani sya nagsiling: “Ok ginapatawad ko un sya!” Ag ana pa gindugangan: “Pero kon buhi pa sya hin-aga, dapalon ko man sia ha!”
Siling ni Henry Ward Beecher: “Makapatawad ako apang indi gid ako malipat” hai pareho man lang sa hambalanon nga “Indi ako makapatawad!” Kristiano gid man bala kita? Ukon Mapinatawaron gid man bala taton?
Mabuhay ong Maalwan nga mga Mambusaonon!
FR. DODO