5th Sunday of Lent (C)

WALA SANG MAY NAGKONDENAR

Sa sining katapusan nga Dominggo sang kwaresma, ginapahayag sa aton kon ano gid ang kahulugan kon ngaman ang aton Ginuong Jesus, nagpakatawo kag nagpuyo upod sa aton– Siya nagkari agud mangin timaan nga ang aton Amay sa langit, wala NAGAKONDENAR sa Iya mga tinuga, kundi Siya padayon nga nagalab-ut sa aton paagi sa pagpatawad kag paghigugma. Nahangpan Niya ang aton kaluyahon, bisan ang aton masami nga pagpakasala.
Sa pihak nga bahin, wala man Siya “nagatolerar” sa aton sa pagpakasala, kundi Iya kita gina-agda sa paglakat sa isa ka “dalanon sang pagpanibag-o”. Amo gani nga sa aton Ebanghelyo subong sa pagsumalang sang aton Ginuo sa isa ka babayi nga nakasala sa pagpangin-lalaki, nga ginkondenar, kag ginpamatbatan sang kamatayon paagi sa pag-bato sa iya sa tunga sang ila “plaza”, ang aton Ginuo, “nag-apin” sa iya, ukon “naghangup” sa iya sitwasyon, apang ang panghangkat sa gihapon sang aton Ginuo nga “maglakat siya, kag dili na magpakasala liwat.”
May huyog kita sa masami, katulad sang mga nagkondenar sa babayi, nga mag-akusar kag magkondenar sa aton mga isigkapareho nga nakasala. Ayhan tungud ini siguro sa balatyagon nga mas maayo kita sang sa ila. Apang nausisa ta bala ang aton kaugalingon nga ayhan basi sobra pa kita sa aton ginakondenar, ugaling wala lang kita madakpan ukon matalupangdan? Basi nagakondenar lang kita agud “matakpan” ang aton kasal-anan?
Amo ini ang ginbuhat sang mga tawo sa babayi, apang sang ginpat-pat na sang aton Ginuo ang ila mga kasal-anan, amat-amat man sila nga nadula! INDI KITA MAGPANGKONDENAR sa baylo BULIGAN TA ANG NAKASALA NGA MAKABANGON!


FR. RONNIE
MAGHINAYHINAY SA PAGPANGHUSGA

Madali kanaton ong magbasol et iban nga tawo sa mga kalainan ag kakulangan nga aton makita ag nasaydan kananda. Kon kaisa, nalipay ag nakunyag pa gani kita sa pagsugilanon, dala tum-ok, nahanungod sa mga kasaypanan et mga tawo. Apang ong Ebanghelyo manakara nagaagda kanaton nga maghinayhinay kita sa pagpanghusga. Dapat kita mangin maluluy-on ag mapinasiensyahon tungod kay kita tanan may ‘baho’ ag kasaypanan, nga swerte ta lang, owa kita nadakpan sa akto. Tanan kita nagakinahanglan et kapatawaran et Ginuo.
“May isa ka babaye nga ginakabig nga ‘buang’ et tanan, tungod kay naga-estorya sia sa ana kaugalingon sa ‘publiko’ ag nagapati nga sia nagapakighala kay Kristo mismo ag si Kristo nagasabat man kuno kanana. Dayon may isa man ka pari nga nag-assign sa sina nga parokya, nga sang pagkabati nana nahanungod sa babaye, nagpanumdom nga sarang nana sia maayo ag mabuligan nga magbalik sa realidad.
Isa ka adlaw, nagsumalangay sanda sa dalan. Ong pari nagmuno, “Tuod kuno nga nagaestorya ka kay Kristo?” “Yes, sir!”, siling et babaye, “nagaestoryahanay kami ni Kristo sa adlaw ag gab-i!” Dayon ong pari naghambal, “Ti pwede ako kahinyo et pabor kanimo? Pwede mo bala mapamangkut si Kristo kon ano ong katapusan nga sala nga akon ginkompesar kanana?” Ong babaye nagsabat, “Syempre Sir, Ikaw pa! Para kanimo, pamangkuton ko sia!”
Pagkahin-aga, nakita et pari ong ‘buang’ sa plaza,
gani ginpalapitan nana sia ag ginpamangkut, “Ti naestorya mo gid man si Kristo kagab-i?” “Yes, Sir!”, sabat et babaye. “Ti ano kuno ong katapusan ko nga sala nga ginkompesar ko kanana?”, pamangkut liwat et pari. Ong babaye nagsabat: “NALIPAT UN KUNO SIA!”
Amo on ong Pagpatawad et Dios. Kon kita mag-hinulsol ag magpangayo et patawad nana, ong aton mga sala ginapanas o ‘ginadelete’ ag ginakalimtan nana. Tani amo man kita kaon sa mga sala et aton mga isigkatawo!



FR. DODO



FOOD FOR THOUGHT
“Forgiveness is choosing to love. It is the first skill of self-giving love” (Mohandas K. Gandhi)