1st Sun. Advent-C

MAGBANTAY KAMO!
Ginasuguran naman naton ang isa ka bag-o nga tuig sa kalendaryo sang aton nga Simbahan, kag sa sini nga kaangtanan, ginahingadlan naton ini nga tini-on sang pinasahi sang sa iban. Aton ini ginatawag nga panahon sang ADBIENTO nga naghalin sa tinaga nga ni-latin nga nagakahulugan sang “pagpa-abut” ukon “paghulat”. Ini nga klase sang pagpa-abut may kinatuhay nga kalidad, tungud ini nga pagpa-abut indi lamang sang pagpa-abut nga may pagpabaya, ukon daw wala’y sapayan lamang nga pagpa-abut, kundi isa ka pagpa-abut nga may buluhaton, paagi sa pagpabilin nga “nagabugtaw” ukon nakamuklat ang mga mata… ini nga pagpa-abut amo ang pagpaabut katulad sang isa ka sulugu-on nga nagahulat sa pag-abut sang iya nga agalon. Pagpa-abut nga “alerto” nga NAGABANTAY, tungud nahibalu-an niya nga ang iya agalon maga-abut sa indi mapaktan nga oras.
Ang panahon sang Adbiento nagahatag sa aton sang kahigayunan sa paghanda sang dalan nga pagaagyan sang aton Mamnluluwas nga matawo sa aton tunga. Sa sini nga tinion, kita gina-agda nga mangin “sensitive” sa aton palibut tungud ang tanan nga nagakahanabo may mga kahulugan kag kaangtanan sa pag-pakatawo sang aton nga Manluluwas.
Kon sang nagligad nga “cycle”, may mga butang kita nga ginpabulag-bulagan, sa sining tion gina-agda kita sang aton Ginuo nga MAGBANTAY kag MAGHANDA nga BUKAS ANG NGA MATA! Ano bala ang aton preparasyon sa Iya nga pag-abut?

FR.RONNIE



ORAS ET DIOS
“May masubo nga balita nga nag-abot sa Dios. Ginasiling et mga ‘guardian angels’ nga istan un lang ong mga tawo nga nagapangamuyo. Kay bisan ginahambal et mga tawo nga importante ong pangamuyo ag nagapanugda man sanda nga magapangamuyo, galing tungod pirme sanda masako, owa un sanda et tion sa pagpangamuyo.
Gani gintipon et Ginoo ong konsilyo et kalangitan ag may anghel nga ‘nagsuggest’ nga dapat dugangan et isa ka oras ong isa ka adlaw agud gamiton et mga tawo sa pagpangadi. Ginpasar dya et konsilyo ag ginmando et Dios. Sang ibantala dya sa katawhan, nalipay gid sanda ag gintawag nanda ong ika-25 nga oras nga “Oras et Dios”.
Apang pagkaligad et pila ka adlaw, isang kurot man lang gyapon ong mga pangamuyo nga nagaabot sa langit. Kay ginagamit et mga mangin-alamon ong ika-25 nga oras sa anda diskusyon kon makabulig gid man bala dya. Ong mga negosyante nagasiling naman nga may daon nga “economic recession” gani ginagamit nanda dya para sa negosyo. Siling naman et mga pari, kinahanglan nanda ong oras nga on sa anda ‘pastoral ministry’. Ag iban pa…
Dayon natukiban et mga anghel nga ong nagagamit kadyang oras para sa Dios amo yadtong, sang una, may daon un nga oras sa pagpangamuyo. Gani ‘nag-conclude’ sanda nga ong pangamuyo owa nasandig sa oras kundi sa paghigugma sa Dios. Ong mga tawo indi mangin palangadi kon taw-an sanda et dugang nga oras. Sa pihak nga bahin, ong mga nagapalangga ag nagadangop sa Dios makakita gid et tion sa pagpangamuyo, bisan pa, sa sulod et 24 ka oras lang.”
Ong matuod nga pangamuyo amo ong pagbatyag nga ikaw ginapalangga gid et Dios. Gani nagapangamuyo ikaw kanana tungod palangga mo man sia. Ikaw nagapasalamat, nagakasadya, ag nagatinguha nga sundon ong ana kabubut-on sa tanan nga kahigayunan. Pirme mo sia ginapanumdom ag ginahulat nga may kalangkag ong ana pag-abot. Tani amo gid kita kaon.


FR. DODO