33rd Sun. Ord. Time

ANG ATON “DIUTAY” NGA TALENTO
Malapit na lang magatakup ang isa naman ka pahina sa Kalendaryo sang Simbahan. Sa dili madugay, magasugud na ang Adbiento nga amo naman ang bag-o nga “cycle” sang Kalendaryo Liturhiko. Amo gani nga bisan ang mga balasahon sa aton mga Misa sa sining mga tini-on, nagapatuhoy sa tema nahanungud sa katapusan nga mga panahon.
Ang Ebanghelyo sa subong nga Dominggo nasentro sa tema sa diin ang Diyos magakari subong isa ka “Agalon” nga magapangayo sing “husay” sa iya mga enkargado, sa diin siya naghatag sang mga nanuhay-tuhay nga mga talento ukon kapasidad sa tagsa-tagsa, ayhan, suno sa ila masarangan. Wala ni isa sa ila nga wala nakabaton. Ang duha, nagpatikang sini sing maayo, apang ang isa nagrason nga “nahadluk” siya tungud “istrikto” ang iya nga agalon, kag gani, iya lang ginlubong sa duta ang “talento” ukon “manggad” nga gintugyan sa iya.
Mahapos maghimo sing “rason” sa aton mga kakulangan, katulad sang ikatatlo nga sulugu-on. Nahadluk gid bala siya? Wala man ginsiling sa Ebanghelyo nga istrikto ang iya nga agalon. Ginsiling lang nga siya nagapangayo sing husay! Pero wala siya sang mahatag, tungud sa pagkamatuod, GINATAMARAN siya magpatikang sang manggad sang iya nga agalon.
Indi kita magsiling nga diutay lang ang aton masarangnan. Panumdumun naton nga si Hitler nagda-ug sa pagdumala sang Nazi Party tungud lamang sa “isa ka diutay” nga boto sang 1923! Madamo pa sa aton maragtas ang nagda-ug tungud sa “isa” lang!
Ayan, diutay lang ang ginhatag sa aton, apang ginhimud-usan ta bala nga magdamo ini? Amo ini ang ipamangkut sa aton sa katapusan! Ano ang ginbuhat ta sa talento nga ginhatag sang Diyos sa aton?

FR. RONNIE