CHRIST THE KING

ANG MATUOD NGA HARI
Ginatakup naton karon nga Dominggo ang isa naman ka pahina sang aton Kaledaryo Liturhiko sa Santa Iglesia Catolica. Sa pagtakup sini aton ginaselebrar ang Kapiestahan sa pagpahayag nga si Kristo amo ang aton nga hari! Hari sang bug-os nga Kalibutan kag hari sang aton nga kabuhi.
Amo gani nga suno sa una nga kustombre, ini nga kapiestahan amo ang kapiestahan sang mga Amay sang mga panimalay tungud ang mga amay amo ang “hari” sang ila nga pamilya… Ang hari nga amo ang dapat nga haligi sang panimalay nga Kristiyano. Ini nga pagkahari naga-ilig sa pagkahari sang aton Ginuong Jesus nga amo ang aton sadsaran sang aton nga pagtuluohan nga Kristiyano.
Diin bala makita ang pagkahari sang aton Ginuo? Siya nagsiling nga “Kon luyag ka nga mangin daku sa atubangan sang Diyos, dapat ka nga mangin kubos… kag mangin sulugu-on sang tanan!” Sa sini nga painu-ino ang pagkahari sang aton Ginuo napasad sa kamatuoran nga Siya nangin alagad kag wala magpa-alagad. Siya nagkari suno sa iya agud “mangin alagad sang tanan kag indi agud alagaran.
Ang pagkahari sang aton Ginuo, matuod-tuod kag wala naga-isip nga pag-alagad. Kag ini amo kuntani ang sulundan sang aton mga amay sang aton tagsa ka panimalay. Ang isa ka amay nga uyaya sa iya obligasyon sa pag-alagad sa iya pamilya, indi takus nga mangin amay sang panimalay! Ang isa ka amay, bilang haligi, dapat mangin kabakud sang iya nga pamilya kag ginagikanan sang kusug sang tagsa ka katapo sa pagpangatubang sang mga kabudlayan sa adlaw-adlaw nga pagkabuhi!
Pila ayhan sa aton mga amay sang pamilya ang makabig naton nga matuod-tuod nga hari nga naga-alagad?

FR. RONNIE

33rd Sun. Ord. Time

ANG ATON “DIUTAY” NGA TALENTO
Malapit na lang magatakup ang isa naman ka pahina sa Kalendaryo sang Simbahan. Sa dili madugay, magasugud na ang Adbiento nga amo naman ang bag-o nga “cycle” sang Kalendaryo Liturhiko. Amo gani nga bisan ang mga balasahon sa aton mga Misa sa sining mga tini-on, nagapatuhoy sa tema nahanungud sa katapusan nga mga panahon.
Ang Ebanghelyo sa subong nga Dominggo nasentro sa tema sa diin ang Diyos magakari subong isa ka “Agalon” nga magapangayo sing “husay” sa iya mga enkargado, sa diin siya naghatag sang mga nanuhay-tuhay nga mga talento ukon kapasidad sa tagsa-tagsa, ayhan, suno sa ila masarangan. Wala ni isa sa ila nga wala nakabaton. Ang duha, nagpatikang sini sing maayo, apang ang isa nagrason nga “nahadluk” siya tungud “istrikto” ang iya nga agalon, kag gani, iya lang ginlubong sa duta ang “talento” ukon “manggad” nga gintugyan sa iya.
Mahapos maghimo sing “rason” sa aton mga kakulangan, katulad sang ikatatlo nga sulugu-on. Nahadluk gid bala siya? Wala man ginsiling sa Ebanghelyo nga istrikto ang iya nga agalon. Ginsiling lang nga siya nagapangayo sing husay! Pero wala siya sang mahatag, tungud sa pagkamatuod, GINATAMARAN siya magpatikang sang manggad sang iya nga agalon.
Indi kita magsiling nga diutay lang ang aton masarangnan. Panumdumun naton nga si Hitler nagda-ug sa pagdumala sang Nazi Party tungud lamang sa “isa ka diutay” nga boto sang 1923! Madamo pa sa aton maragtas ang nagda-ug tungud sa “isa” lang!
Ayan, diutay lang ang ginhatag sa aton, apang ginhimud-usan ta bala nga magdamo ini? Amo ini ang ipamangkut sa aton sa katapusan! Ano ang ginbuhat ta sa talento nga ginhatag sang Diyos sa aton?

FR. RONNIE

DEDICATION OF ST. JOHN LATERAN

PAGTAHUD SA PULOY-AN SANG DIYOS
Sa isa ka puloy-an may mga nanari-sari nga mga hulot ukon lugar sa diin kita nagabuhat sang aton mga buluhaton. May yara nga sala, kon kita nagakinahanglan maghilay-hilay ukon magsugilanon. May yara nga hulot tululogan kon luyag kita mag-”descanso”. May hulot kalan-an ukon “dining room” kon luyag kita magka-on. May kasilyas ukon “Comfort Room” kon kita magbuhin sang sobra nga nagasulud sa aton lawas… kag madamo pa nga mga klase sang mga hulot nga sarang naton maplastar sa aton mga panimalay. Ang iban may yara nga “Music Room” ukon “TV Room” ukon “Bar” kag iban pa. Ini tungud luyag naton nga ang tanan “plastado” kag ang aton buluhaton ginahimo naton sa insakto nga lugar.
Amo man ini ang Simbahan. Ini ginakabig naton nga isa ka BALAAN” nga duog, tungud diri nagasumalang ang kabuhi naton nga nagapakig-angut sa kabuhi sang Diyos. Ang Simbahan balaan tungud kita nagapati nga diri “NAGAPUYO” ang LABING BALAAN sa tanan– Ang Diyos nga aton Manunuga. Ginbalay naton ini para sa Iya agud Siya madulutan naton sang PAGHIMAYA, PAGDAYAW, PAGHIGUGMA, PAG-ALAGAD KAG PAGTAHUD! Diri sa Simbahan ginahiwat ang mga butang nga ginakabig naton nga Sagrado sa atubangan sang Diyos!
Amo gani nga naakig gid ang aton Ginuong Jesus sang makita Niya nga ang balay sang Iya nga Amay, ginhimo nga “Merkado” kag “Balay sang mga Makawat kag mga Buyong” sang mga tawo. Siya nagahigugma kag nagatahud sang tuman sa Iya nga Amay, kag Siya nagala-um man nga kuntani ang mga tawo nga gintuga sang Amay suno Iya laragway maghatag man sang nagaka-igo nga katahuran.
Kon magsulud kita sa Simbahan, ginapatuhoy bala naton ang tama nga katahuran sa Diyos? Anak bala kita sang Diyos o mga Buyong?
FR. RONNIE