fr. Dodo's Reflection

ANG BALLPEN. BOW! (26TH SUNDAY ORD.TIME)

Sa aton relasyon sa Dios, indi importante kon ano ang aton ginahambal o kon ano ang aton ginapromisa. Ang mas labing importante amo nga kon ano ang aton nahimo kag kon ano ang aton ginpakita sa buhat. Kay dya amo ang marka kag palatandaan nga kita matuodtuod gid nga SUMULUNOD ni KRISTO!
“Isa ka adlaw, may isa ka negosyante nga nag-order sang 1000 ka ballpen sa isa ka manugbaligya matapos ang malawig nga pagkumbinse sini. Sang isulat na sang salesman sa iya notebook ang order sang negosyante, nakibot sya kag nakum-an sa ginhambal sang iya ginbaligyaan: “Hopss! Dali lang! Ikansel na lang ang akon order! Indi nako magbakal sang ballpen mo!” Kag ang negosyante nagpanaw sang dalidali pagwa sa store.
Sang iya masumalang ang iya amigo nga nakumbinse kag nakabakal man sang amo nga klase sang ballpen, dya nagpamangkot sa iya, “Migs, ngaman ginkansel mo ang imo order sang ballpen?” Ang negosyante nagapangakig nga nagsabat: “HAMAN MIGS? Tungod sang pagkatapos sulosobra isa ka oras nga pagkumbinse sang kupagkupag nga salesman kanakon nga dapat ko gid baklon ang iya ballpen tungod dya amo ang pinaka’the best’ sa tanan, iya lang tana ginsulat ang akon order paagi sa LAPIS! Ang iya ginbuhat salikwaot sa iya ginhambal!”
Sa aton relasyon sa Dios, matuod nga wala gid man labot ang ‘ballpen’ apang ang punto dira imaw dya: Ginabuhat gid man bala naton ang aton ginabungat? Ginatuman bala naton ang aton ginapromisa? Ginapamatud-an bala naton ang aton sinumpaan? Ginakabuhi bala naton ang aton ginatuohan?