Homily for the Baptism of the Lord (Jan.13, 2008)

“ Ang hinigugma nga Anak yara sa Eukaristiya bilang Kabuhi sang Kalibutan”

“INI AMO ANG AKON HINIGUGMA NGA ANAK; PAMATII NINYO SIYA”
(Mt 3: 13-17)
“PAGBUNYAG SA GINUO”

By: FR. JOSE RONNIE T. BANIAS
Parish Priest, St. Joseph P.U.C.
Dulangan, Pilar, Capiz


May isa ka Obispo sa Latin America, si Bishop Herder Camara, nga nagtugda sang subong sini: “ Sang nagahatag ako sang pagka-on sa mga imol, ginasiling nila nga ako, Kristiyano. Sang nag-abut ang tion nga ginpamangkut ko ang akon mga ginhatagan sang pagkaon kon ngaaman nga “gutum” sila, ginbansagan nila ako nga isa ka KOMUNISTA!

Daw halos isa na ka ginabaton nga sitwasyon ang kaimulon kag gutum, indi lamang sa aton pungsud kundi sa bug-os nga kalibutan. Daw sa upod na sa nesisidad sang aton pangabuhi ang pagkakulabos kag pagkagutum. Ang aton katilingban daw sa indi sang kumpleto kon wala ang presensya sang mga imol! Kon sa bagay, may isa ka manunulat nga nagsiling: “Ang Diyos naghigugma sing kapin sa mga imol sa bagay nga nagtuga Sya sang sobra kadamu sa ila!”

Amo gid bala ini ang luyag sang Diyos ukon ini tanan nagaluntad tungud sa aton kahimuan? Naupud bala sa plano sang Diyos nga ang Paskwa ukon ang New Year para lang sa mga manggaranon kag mga may ikasarang, samtang ang kadamuan nagakamusmus sa kapigaduhon? Yara bala sa tinutuyo sang Diyos nga magluntad ang daku nga gil-at sang mga may ara kag mga wala-wala?

Ginasiling subong sang aton Santos nga Ebanghelyo nga ang aton Amay sa langit nahamu-ut gid sa Iyang Anak, tungud kay paagi sa Iya pagbaton sang bunyag ni Juan, nga indi man gani Niya kinahanglanon, natuman ang plano sang Amay. Sang pagtusmug sa aton Ginuo sa suba sang Jordan, Iya man gintusmug ang Iyang kaugalingon sa pagpakig- angut sa kabuhi sang katawohan. Ginasiling gani nga sa pagbunyag sa aton Ginuo, Iya ginsuklub ang aton pagkatawo kag pagkamakasasala… nangin isa Sya sa aton pagkatawo agud kita mangin isa sa Iya pagka-Diyos! Upud sa Iya pagsalum sa aton kahuyangon, Siya nagbutwa agud kita man maka-upod sa Iya sa Iyang kabuhi nga Diyosnon! Sa sini, nahamu-ut ang aton Amay!... Nahamu-ut Siya tungud nga sa liwat ang bug-os nga katawhan nangin isigkamanunubli sang Iya Ginharian nga Iya gintigana sa tagsa-tagsa sugud pa sang ginsuguran!

Ang plano sang aton Amay amo nga kita magkabuhi sang may kabuganaan tungud Siya isa ka bugana nga Amay. Indi Siya sang imol nga Diyos kag nagakaigo lang nga ang Iyang mga anak indi man mag-mangin-imol! Isa ka daku nga insulto sa aton Amay sa langit ang kaimulon tungud gani Siya amo ang kapupun-an sang tanan!

Apang, ngaman may mga imol? May mga ginakulabus? May mga ginakulang? Kon indi ini kahimu-an kag upud sa plano sang Diyos, ayhan wala kita sang iban nga balikdon kundi ang aton kaugalingon, kag usisa-on ang aton mga kakulangan kag kapaltahan. Samtang nagasaulog kita sining Santos nga Eukaristiya, aton usisa-on ang aton kaugalingon kon bala nangin matutum kita sa pagsunud kag paghatag sang katumanan sa sining selebrasyon nga ginbilin sa aton sang aton Ginuong Jesus.

Suno sa aton Santo Papa, Benedicto XVI, ang Santos nga Eukaristiya may mga kaundan nga dili naton sarang mabale-wala ukon mapabulag-bulagan. Sa iya ginsulat nga libro “ Sacramentum Caritatis” siya nagpamalandung sang mga masunud sa “paragraphs 88-95”: “Nga ang Santos nga Eukaristiya nagabuyuk sa aton, nga personal nga makig-angut sa isa kag isa nga nagadala sang paghiusa, agud mabag-o ang mga estruktura nga nagapakanubo sa tawo, sa diin ang tagsa-tagsa magkatalupangud sang ila pagka-alalangay, kag sa sini, paga-pakig-ambitan sang tanan ang bunga sang duta kag ginpangabudlayan sang tawo sa pagpahayag sang matahum nga mga gintuga sang Diyos para sa bug-os nga katawhan.”

Mga utod, ang mga pulong sang aton Santo Papa isa ka daku nga paghangkat nga ginapa-atubang sa aton! Sa kadugayon na nga kita nagasa-ulog kag nagapasakup sa Santos nga Misa ukon sa Santos nga Eukaristiya, aton bala napahayag sa aton kabuhi ang pangkabilugan ukon “social” nga bahin sang Santos nga Misa? Pila ayhan sa aton ang nagasiling sa pagkatapus naton simba sa adlaw sang Domingo: “Ah… ok na ako kay naobra ko na ya ang akon obligasyon… bahala da ya ang iban nga wala pa ka simba!” Pila ayhan sa aton nga sa pag-abut sang paghinatagay sang paghidait, matam-is nga yuhum ang aton ginahuptan, apang pag gwa sa simbahan, nagasilabo ang aton dugo sa aton pagkakita sa aton kaaway? Pila ayhan sa aton nga kon yara kita sa sulud sang Santos nga Misa daw mas mabuot pa kita sa mga imahen sang mga Santos nga yara sa sulud sang Simbahan apang pagpa-uli naton sa aton panimalay, nagatuhaw ang aton kapintas sa aton mga kabataan kag mga kabulig? Pila ayhan sa aton nga yari diri subong sa sulud sang Simbahan, nga sa aton pag gwa, naga-gwa man ang aton minatu-od nga pagkatawo… sa gihapon naluyag kita magpanglibak, magpinangbantay sang hulag kag sala sang iban, mag-inimut sa mga nagakinahanglan, magpanumdum lang sang aton kaugalingon nga kaayohan bisan ginalapak na naton ang deretso sang aton isigkapareho? Pila ayhan sa aton ang yari diri subong nga sa gihapon nagapabilin nga hakugan kag sungak-sungak sa mga pagkabutang sining kalibutan, bisan pa nga nakita naton ang aton mga kautoran nga mga wala-wala kag mas kapin nga nagakinahanglan?

Mga kautoran, Kapiestahan subong sang Pagbunyag sa aton Ginuong Jesukristo, kag Iya nga ginapabatyag sa aton, sa aton nga selebrasyon nga Siya, amo ang matuod nga kabuhi sang kalibutan. Apang maangkon lamang naton ining kabuhi nga Iya ginatan-ay sa sining Santos nga Misa kon ang tagsa-tagsa sa aton maghimud-os nga mag-angut sang iyang kabuhi sa KAUNDAN sang Santos nga Eukaristiya. Ang Santos nga Eukaristiya indi sang isa ka sarswela o palagwa-on, ukon drama, nga sa pagkatapos hambal sang pari “maglakat kamo sa paghida-it”, tapos naman dayon ang tanan! Ang Santos nga Misa isa ka ganhaan nga nagalapad ang iya nga pagbukas paagi sa aton pagpahi-ambit sini sang Iya mga bunga sa aton mga kautoran… ini nagapabilin nga bukas agud kita makalab-ut sa aton mga isigkapareho ilabi na gid sa mga kubos sang aton katilingban!

Ang Santos nga Misa isa ka selebrasyon nga nagatudlo sa aton nga aton kabuhi dapat igapa-ambit sa aton isigkatawo… ang kaalwan sang Diyos nga aton ginabaton sa tagsa naton ka pagsaulog sini nagabuyok sa aton nga mangin maalwan sa isa kag isa… ang pagpatawad sang aton Amay nga aton ginabaton dapat man aton dalhon sa aton mga kautoran nga may mga kakulangan sa aton… ang pagtubos nga ginahatag sang aton Ginuong Jesukristo paagi sa Iya paghalad sang Iyang kabuhi sa aton, amo man ang pagtubos nga aton pagadalhon sa aton mga isigkatawo nga nagakalumos-lumos tungud sang ila kaimulon.

Hinigugma ko nga mga kautoran, ang aton selebrasyon sang Santos nga Misa isa ka selebrasyon sa PAGPA-AMBIT sang kabuhi. Ginapahanumdum kita diri nga kita mga engkargado lamang sang aton nga Amay sa langit, kag kon ginhatagan kita sang mas kapin sang sa iban naton nga kautoran, indi ini agud kabigon naton nga mangin aton lamang, kundi agud aton man ini ipa-ambit sa aton mga kautoran nga nakulangan, agud nga paagi sa aton, mabatyagan sang tagsa-tagsa ang wala’y tupong nga kaalwan sang aton Amay sa langit. Sa sini nga paagi, aton matuman ang binu-buot sang aton Amay… mapadayon naton ang pagpanubos sang aton Ginuong Jesukristo, kag mapabakud naton ang ginahikut sang Espiritu Santo agud kita maghili-usa bilang isa ka katilingban nga may pag-alalangay bilang mga matuod nga mga anak sang aton Diyos.

Mga utod, kon nagapamangkut kita ngaman may mga ginagutum o may mga imol, ini indi tungud kay komunista kita, kundi, ini tungud nga luyag naton mahibalu-an kag matukiban ang sistema nga nagpaluntad sini sa aton katilingban. Ini nga mga sistema amo ang mga pagpa-iya-iya, pagpamintaha, kag pagkahakug! Tungud sang indi mapuno nga kaluyagon sang tawo, siya nagapatuyang sa iya luyag nga maangkon bisan pa ini nagakahulugan nga ang iban mawad-an! Kita ang naghimo sini nga sistema, kag nagakabagay lang nga kita man ang magtadlong kag maghimo sang isa ka sistema nga nasanto sa aton selebrasyon sang Santos nga Eukaristiya sa diin aton mabatyagan nga matuod kita nga makaangkon sang dignidad sang isa ka anak sang Maalwan nga Amay.

Mientras may mga imol sa aton palibut, ayhan masiling naton nga kita man may salabton sa ila nga sitwasyon, apang sa aton pagpasakup sa Santos nga Eukaristiya, kita man nagahuput sang solusyon sa paghaw-as sa ila gikan sa ila kaimulon. Suno sa dinalan sang Santos nga Kasulatan, sang paghimo sang aton Ginuo sang milagro sa pagpamuad sang tinapay kag isda, Siya nagsiling sa Iya mga gintutun-an: “Kamo mismo ang maghatag sa ila sang pagka-on”, kita man Iya ginamandu-an subong nga indi lamang magkalu-oy sa mga imol, kundi nga kita maghimo sang mga LIHUK agud kita mangin bahin sang pagpinabag-o sang sistema nga nagalugmuk sa mga tawo sa kaimulon. Kita Iya ginamandu-an nga MAGHULAG agud maglab-ut sa aton mga kautoran nga ginakulabos, kag Iya kita ginamanduan sa paghimo sang mga TIKANG sa pagpalapit kag paghaw-as sa aton mga kautoran nga wala-wala.

Nasa-ulog na naton ang bag-ong tuig. Isa naman ka bag-o sang kalendaryo kag sa pagdugang sang edad sang kalibutan. Kabay pa nga ini nga tuig magpahamtong man sang aton nga pagtuo, nga paagi kay Kristo, kag upod kay Kristo, kag dira kay Kristo aton malab-ut ang mga handum sang aton Amay sa langit, nga kita tanan magkabuhi bilang Iya mga alalangay nga mga Anak kag utod sang aton Ginuong Jesukristo. Sa sining aton nga hilikuton kabay pa nga ang aton Amay sa langit makasiling man sa aton: “Ini amo ang akon mga pinalangga nga mga anak… nahamu-ot gid ako sa ila!”.