17th Sunday (B) Ord. Time

PAMALANDONG SA EBANGHELYO

MAY ISA KA BATA DIRI…
Ang matahum kag makatalandog nga eksena subong sa aton Ebanghelyo amo nga may isa ka bata nga maalwan nga nagpaambit sang iya nga pagkaon bisan pa nga nahibaluan niya nga nilibo ang palakan-on nga suno sa Ebanghelyo, mga lima ka libo nga mga lalaki, wala labot ang mga babayi kag mga kabataan. Ini nga bata wala gid magpulu-panumdum kon paano makakaon ang mga tawo sa iya “ahaw” nga pagka-on. Bisan gani ang mga gintutun-an nagsiling: “Pero ano ang pulos sini sa amo nga kadamuon sang mga tawo?” Daw sa ginsiling nila nga: “Its an exercise in futility!”
Siguro, amo gid man ini ang mga kabataan– sige lang nga sige… bisan nadadasma na sa paghampang, sige man gihapon… bisan nag-ilinaway na sila sang ila mga kahampang… sige man gihapon… bisan pa balibaran sang ila ginikanan sang ila ginapangayo… sige man gihapon asta gid maghatag ang ginikanan.
Ayhan amo man ini ang rason kon ngaman “na-obligar” ang aton Ginuo sa pagbuhat sang milagro sa pagpamuad sang tinapay kag pagpadamo sang mga isda nga mangin kalan-on sang mga ginagutum nga mga tawo.
Amo ini ang sahi sang tagipusuon nga ginapangita sang aton Ginuo sa tagsa-tagsa sa aton. He is very consistent with His teaching that “Unless you become like little children, you cannot enter the Kingdom of God…”
Masami sa aton kapakaton kag mga “abilidad”, daw nalilimtan na naton nga mangin isa ka bata. Ang aton Amay sa langit, yara lang nga magahatag sang PINAKAMAAYO sa aton. Magsalig kita sa Iya!
FR. RONNIE