4th Sun. Ord. Time (B)

GINAGIKANAN SANG OTORIDAD
Ang isa sa mga ginakahangaw-an sang mga tawo sa pagpanudlo sang aton Ginuo, amo nga Siya nagapanudlo nga may OTORIDAD nga bisan ang mga demonyo nagsunud sa Iya mga mando. Madali nga ginaligwat ini sang mga mga Pariseo nga nagasiling nga ang aton Ginuo nagabuhat sini tungud nga Siya may “alliance” sa Prinsipe sang mga demonyo! Apang mahapos man nga ginbali sang aton Ginuo ang ila argumento sa pagpa-athag nga ang isa ka panimalay nga nagabinahin-bahin indi magdugay, kundi magabulog-lag!
Ang otoridad sang aton Ginuo nga ginakahangaw-an sang mga Pariseo amo nga ini wala Niya ginakuha sa iban, ukon indi ini pareho sang mga manunudlo sang kasugu-an nga nagagamit sang pormula nga: “Suno sa kasulatan”, ukon “Suno sa kay Propeta…”, ukon, “ Suno sa kasugu-an…” kundi Siya nagamando suno sa IYA KAUGALINGON nga otoridad! Ini agud sa paghibalo sa ila nga sarang Niya mabuhat ini tungud Siya amo ang Anak sang Diyos… Siya amo ang Pulong nga nangin tawo nga paagi sining Pulong ang tanan natuga kag nag-ambit sang kabuhi sang Diyos. Sa pagkatawo sang aton Ginuo ang tanan may bag-o nga kabuhi!
Ang mga Pariseo bilib sila sa ila kaugalingon. Nagadumdum sila nga sila lang ang maalam kag may ikasarang! Apang ang ila kaalam tubtub lang sa ila panghuna-huna apang wala ini gina-updan sang ila buhat. Sa pihak nga bahin ang aton Ginuo may otoridad tungud ang Iya ginatudlo gina-updan sang Iya BUHAT!
Ginabuhat ta man bala ang aton ginatudlo?
FR. RONNIE

ONG PANIMUOT AG KABUBUT-ON ET DIOS
Sang ako mag-adto sa Caphernaum, akon nakit-an ag
natungtungan ang mismo nga SINAGOGA nga anay ginsudlan ag ginwalihan ni Kristo, suno sa ginmitlang sa Ebanghelyo (Mk1,21). Dya amo ang pinakahanggud ag nagaisahanon nga Sinagoga nga imo makita sa bilog nga Israel nga daon pa ong ana sini orihinal nga mga haligi ag pundasyon. Dya mga veinte metros ang kalayuon halin sa balay ni San Pedro nga ginakabig nga ilistaran ni Kristo kon duri Sya mag-adto ag kon sa diin ana nga gin-ayo ong ugangan ni Pedro sang dya hilanaton.
Kinaandan un sa Sinagoga nga ong isa ka ‘RABBI’ magkomentaryo sa Santos nga Kasulatan, masami paagi sa bulig et ‘pag-quote’ sa mga nagkalainlain nga ‘sources’, agud sa pagtudlo sa mga tawo et mga ‘pamaagi’ et Dios. Kita makasiling nga si Kristo nakapanudlo bangud Sya ginakabig man nga ‘RABBI’ o Manunudlo, et mga tawo. Gani sa sini nga tiempo ag punto, Sya gin-agda ag gintaw-an et kahigayunan sa paghambal bilang anda nga ‘guest speaker’.
Si San Markos nagasugid kanaton nga kon si Kristo ang magtudlo, ang tanan nga mga tawo natingala gid. Indi Sya et pareho sa mga Manunudlo et Kasugoan. Wala Sya naga-quote sa ginsiling et iban kundi Sya nagatudlo nga ‘may awtoridad’.
Paano si Kristo makapanudlo nga may ‘awtoridad’? Lain si Kristo sa tanan nga mga ‘Rabbi’ bangud sa simple nga rason nga SI KRISTO DIOS. Sa ana nga pagpanudlo, ong ana ginahambal amo gid ong PANIMUOT AG KABUBUT-ON ET DIOS.
Kita man dapat magtinguha sa pag-angkon sa aton mga kaugalingon kadyang PANUMDUMAN AG KABUBUT-ON ET DIOS. Magaabot ong mga tion nga kinahanglan naton magtao et ‘advise’ ag ‘counsel’ sa iban. Kon wala et bulig ag pagtuytoy et Espiritu Santo, ong aton ginahambal mangin ‘samong’ o ‘gamo’ lamang, ag indi makadulut sa taguipusuon ag igdulungog et mga nagapamati kanaton.
FR.DODO

3rd Sun. Ord. Time- B

ANG PAGTAWAG
Sang pagsugud sang ministeryo publiko (public ministry) sang aton Ginuong Jesukristo, Siya nagtawag sang pila ka mga tawo nga mangin Iya mga gintutun-an. Ini nga mga tawo nahamtang sa sitwasyon nga yara sila sa ila naandan nga pagpangabuhi, nga ayhan sa sadto nga tini-on, katulad man sa kadamu-an sa aton, masako nga nagahiwat para sa ila adlaw-adlaw nga pangabuhi-anan. Apang bisan pa nga sila yara sa tunga-tunga sang ila mga buluhaton, ginbayaan nila sang “HINALI” ang ila mga sahid kag panimalay, kag nagsunud sa aton Ginuong Jesukristo! Wala na sang “question”… wala sang pamalibad… wala sang rason-rason, sila nag-upod nga ayhan “pagtuo” gid lang ang balon, nga ang nagapangagda sa ila indi gid magdala sa ila sa kalainan ukon magbutig sa ila sang Siya maghambal nga:”Sugud karon, tudlu-an ko kamo sa pagpanahid sang mga tawo!”
Ginpili sang Ginuo ang mga “simple” nga mga tawo… halos wala gani sila sang tinapusan nga kurso, ang ila gid lang nahibalu-an amo ang pagpangisda… mga “malangsa” nga klase sang mga tawo… mga ordinaryo kag indi maalam nga mga tawo! Sila amo ang ginpili sang aton Ginuo indi tungud kay mahapos sila tontohon kundi nga tungud sang ila pagka-ordinaryo kag pagkasimple, sila mangin alagyan sa diin mapahayag sang Diyos ang Iya kaalam kag pagkagamhanan.
Sa aton panahon ayhan masiling naton nga ordinaryo lang kita nga mga tawo, apang padayon sa gihapon ang pagpanawag sang aton Ginuo. Ayhan “masako” man kita! Sa tunga sini tanan, ginasabat ta bala ang pangagda sang Ginuo?
FR. RONNIE

SANTO NIÑ0 (B)

Sa titulo sang aton Ginuo bilang Santo Niño, aton matalupangdan, nga kon aton lantawon sa “grammar”, ini nagapahayag sang isa ka pagsalungkaki sang ideya. Ang “Santo” nga termino ginagamit lamang para sa mga “hamtong” nga mga tawo. Para sa isa ka “niño”, ang dapat nga termino nga gingamit “Santito”, tungud siya, gamay. Ang titulo nga “grammatically right” dapat “Niño Santito”!
Apang ngaman nga wala gid magbaylo sang painu-ino ang aton nga Simbahan sa paghatag sang titulo nga “Santo Niño” sa aton Ginuo sang Siya bata pa? Ini tungud, ini nga titulo indi sang suheto sang grammar, kundi sang aton pagtuo! Bisan ang aton Ginuo gamay, o indi pa hamtong, apang ang Iya pagkabuhi ‘daku” sa panulukan sang Iyang Amay sa langit… Ang Iya pagkamasinulundon sa binubuot sang Amay amo ang naghimo sa Iya nga “labing daku” sa tanan nga mga tawo kag mga hari nga nagtuhaw sa sining kalibutan.
Ang aton Ginuong Jesus “Santo” bisan pa sa dagway sang isa ka bata, tungud Siya nagpabilin nga mapainubuson sa pagbaton sang Iya nga misyon, bisan pa ini nagakahulugan sang paghalad sang Iyang kabuhi didto sa kahoy sang Krus. Indi bala nga ang aton Ginuo ang nagsiling nga: “Ang nagapa-ubos sang Iya kaugalingon, pagapataason”?- Ang PINAKAKUBOS amo ang PINAKADAKU sa atubangan sang aton Amay sa langit!
Naghamtong na bala kita sa aton pagtuo?
FR. RONNIE

BAPTISM OF THE LORD (B)

ANAK NGA NAHAMUT-AN
Sa Kapiestahan sa “Pagbunyag” sang aton Ginuong Jesus, aton mabati-an ang mga pulong sang Ebanghelyo ni San Markos nga gikan sa langit nga nagasiling: “Ikaw ang akon hiinigugma nga Anak. Nalipay gid ako sa Imo.” Ini nga mga pulong ginpahayag sang aton Amay sa langit sang ang aton Ginuong Jesus nagbaton sang bunyag nga ginahatag ni Juan Bautista.
Ayhan madamo ang nagapamangkut kon ngaman nga nagbaton sini nga pagbunyag ang aton Ginuo, kay ini nga pagbunyag isa ka pagbunyag sa pagpatima-an sang paghinulusol, kag ang aton Ginuo, wala man sang dapat nga pagahinulsulan kay wala man siya sang sala! Amo man ini ang naghatag sing palaligban kay Juan Bautista. Para sa iya, dapat siya ang magbaton sang pagbunyag nga igahatag sang aton Ginuo.
Apang ang aton Ginuo wala magpabunyag kay Juan tungud kay kinahanglanon niya nga maghinulsol ukon mahilway sa sala, kundi siya nagpabunyag tungud Siya NAGAHI-USA sa estado sang tawo nga “makasasala” kag tungud sini nga paghi-usa, iya man GINBATAK ang pagkamakasasala sang tawo sa pag-ambit sang Iya nga PAGKABALAAN. Sa sini nga pamaagi, ginpakita sang aton Ginuo nga tawo nangin BUG-OS nga tawo indi tungud kay siya nakasala, kundi tungud kay siya nagapakabalaan o nagapakasantos! Sa sini nga pamaagi, GINAPAHALIPAY KAG NAHAMUOT ang aton Amay sa langit!
Masiling bala naton nga nahamuot man ang aton Amay sa aton adlaw-adlaw nga mga ginabuhat?
FR. RONNIE