Wednesday, October 22, 2008

30th Sun. Ord Time

MATUOD NGA PAGHIGUGMA
Masami, sa aton nga lenggwahe, kon magsiling ikaw nga ikaw nagahigugma, ini nagakahulugan nga “mamag-an” ang imo balatyagon… daw nagalutaw ikaw sa rosa nga panganud… ukon kanami sang imo balatyagon kay daw sa masanag ang tanan… ukon iban pa nga makapahayag sang manami nga eksperyensya. Masami ginapaangid naton ang paghigugma suno sa aton NABATYAGAN.
Apang kon aton nga usisa-on ang dinalan sang Santos nga Kasulatan, malayo ini kaayo nga kahulugan sang minatuod nga paghigugma. Kay sa mga pulong sang Diyos, ang paghigugma indi lamang sang balatyagon, kundi isa ka DESISYON!... Desisyon nga bisan indi man maayo ang imo pamatyagan, sa gihapon padayon ikaw nga magahatag sang katumanan sini tungud ini isa ka SINUMPA-AN NGA BALAAN,
Sang pagpadala sang aton Diyos nga Amay sang Iyang Anak agud maghalad sang Iyang kabuhi sa aton, Siya naghimo sang isa ka desisyon sa paghigugma sa aton bisan pa nga dili kita takus tungud sang aton mga sala, agud padayon Niya mapaambit ang Iya himaya sa aton.
Sang ginhalad sang aton Ginuo ang Iya kabuhi sa Krus sa isa ka makahuluya nga kamatayon sang isa ka Kriminal, Siya naghimo sang isa ka desisyon sang kahulugan sang Iya nga paghigugma sa aton.
Ang paghiguma kabus nga ginasimbolo sang “tagipusu-on” lamang. Ang minatu-od nga simbolo sang paghigugma amo ang KRUS… paghigugma nga handa mag-antus bisan pa ini nagakahulugan sang paghalad sang kabuhi.Naghigugma bala kita sang MINATUOD? Ano ang aton mga desisyon sang paghigugma?

FR. RONNIE

Thursday, October 16, 2008

29th Sunday Ord. Time- A

MASAKO UKON MATAMAD?

Sang ginhatag sang Diyos sa kay Moises ang Iya napulo ka mga sugo, ang ikatatlo sini nagasiling nga “Pakabala-ana ang adlaw sang Diyos.” Sa aton nga mga Katoliko ini nga adlaw, nga adlaw sang “Inugpahuway” amo ang adlaw sang Dominggo. Iya ini nga adlaw sang Diyos- amo ini ang adlaw nga ginatumud bilang “Dies Dominica”, tungud ini amo ang adlaw sang Pagkabanhaw nga amo ang piesta sang mga piesta sa diin gindaug sang aton Ginuong Jesus ang gahum sang Kamatayon.
Bilang pagpakabalaan sini, kita ginahatagan sang kahigayunan sa pagdayaw sa Diyos paagi sa aton pagtipon, bilang isa ka panimalay sa Iya nga puluy-an nga amo ang templo ukon kon sa aton nga panahon, sa Simbahan.
Amo ini ang ginasabat nga pamangkut sang aton Ginuo sa mga luyag magdakup-dakup sa Iya kon bala nagakadapat nga magbayad sang buhis ang mga Israelinhon sa mga gobyerno sang Roma. Sa mga pulong sa Ebanghelyo ginsiling sang aton Ginuo nga “Ihatag kay Cesar ang para sa kay Cesar kag sa Diyos ang para sa Diyos.” Buot silingon nga obligasyon kita para sa aton gobyerno bilang mga katapo sang pungsud, apang may obligasyon man kita sa Diyos bilang katapo sa iya PAMILYA, kay kita Iya mga anak.
Ginahatag bala naton ang Adlaw sang Diyos para sa Iya? Ukon masako kita tungud sa aton pangabuhian? Unahon ta ang Diyos nga ginagikanan sang aton pagpaninguha, kag ang tanan, igahatag sa aton. Basi indi man kita masako...MATAMAD LANG!

FR. RONNIE

Thursday, October 9, 2008

28th Sunday- Ord. Time- A

MGA KAHIGAYUNAN SA KABUHI
Ang kabuhi sang isa ka kristiyano sa karon nga panahon, padayon nga ginahangkat sa tagsa ka iya gina-agihan. Madamo sa aton subong ang halos nagalutaw sa painu-ino kag pamangkut paano bala naton masumalang ang aton Ginuo, kag paano siya ma-eksperiyensyahan sa aton adlaw-adlaw nga pagkabuhi.
Ayhan isa ka daku nga “grasya” sang Diyos nga makita gid naton si Kristo “in persona”, nga Siya gid ang aton gina-atubang. Sa masami, wala ini nagakahanabo. Gani, paano naton masumalang si Jesukristo sa aton nga panahon subong.
Sa Santos nga kasulatan, Siya nagasiling nga “kon sin-o ang nagabaton sang pinaka-labing kubos sang iya mga kautoran, nagabaton man sa Iya.” Buot silingon nga padayon ang Iya nga presensya sa aton tunga… padayon Siya nga nagapalapit sa aton paagi sa mga kubos… padayon Siya nga naga-agda sa aton sa pagtalupangud sang Iya pangagda nga mangin kaupod kita Niya sa Iya lamesa kag bangkete.
Ang tagsa ka tini-on sang aton kabuhi napun-an sang pangagda sang aton Ginuo, apang sa masami, wala naton ginamulalungan ang Iya pagpanawag kay nawili kita sa aton mga kabilinggan! Ang tagsa ka pagtan-ay naton sang bulig sa nagakinahanglan, pagkilala nga ang Diyos yara sa aton tunga.
“Opportunity knocks only once”, kag sa pagpanuktuk sang aton Ginuo paagi sa mga kubos, ginabuksan kag ginabaton bala naton Siya?
FR. RONNIE

GAME NA!
“Isa ka adlaw, nag-ugahab si Lola Basyang tungod nadula ong iya pinalangga nga si Ruby. Gani nagamihamiha nga nag-adto sya sa Bombo Radyo agud tani magpa-agong. Ang reporter naghambal kanana, ‘Okey la, on-air na kita! Pwede ka na kapanawagan!’ Kag si Lola Basyang nagpanawagan, “Kuruuk, krruuk, kruk, kuurrok, kruukkkay…!” Si Ruby manok gali.”
Matahum panumdumon nga ginpakilala ni Jesus ang Ginharian sang Dios bilang isa ka Punsyon sang Kasal. Apang mas matahum pa gid masaydan nga kita tanan ginaagda, bisan pa indi takus, sa pagpakigbuylog duri. Taliwas sa panawagan ni Lola Basyang, klaro ang PANAWAGAN ag PANGAGDA sa aton sang Ginuo ag Sya nagahulat o nagaexpektar gid sang aton sabat sa pagtambong – Duri na ag Manakarya, indi sang Hindon o Hin-aga pa!
Apang masami kita nga mga tawo NAGAPAMALIBAD sa sini nga IMBITASYON sang Ginuo. Kaangay sang lalaki nga nag-adto sa iya uma, ayhan nagatao kita et labi nga pagpasulabi sa aton mga hilikuton sa bagay nga nalipatan na naton ang Dios. Ukon kaangay sang tawo nga nag-adto sa iya baligyaan, ayhan ginapasulabi naton ang aton negosyo ag pagpangita sang manggad. Madamo nga mga pagkabutang, kalingawan ukon kabalak-an, bisan pa gani maayo nga mga butang, ang sarang makapahilayo sa aton sa Ginoo. Ginapangita naton ang mga bugay ag dulot sa bagay nga ginakalimtan naton ang nagtao sini.
Sa pagkamatuod, ang PANGAGDA sa aton sang Ginuo, pangagda sa pagkabuhi suno sa landong sang Iya kabuhi; sa pagkabuhi suno sa Iya gintudlo ag binuhatan. Isa dya ka pangagda sang pagbag-o ag magkabuhi bilang matuodtuod nga mga Sumulunod ni Kristo. Kag sa sining Iya pangagda, ang Dios nagalaum gid sang aton POSITIBO nga RSVP, SABAT ag SAAD. Indi ta pag-indianon ang Ginoo.Kay Sya pat-ud nga magaindian man sa mga naga-indian kanana.
Gani pamangkuton ta ang mga kaugalingon ta,“GAME KA NA BA?” Tani ang sabat ta, nagalupok nga “GAME NA!”


FR. DODO

Friday, October 3, 2008

27th Sunday Ord Time (A)

ANO ANG ATON MGA BUNGA?

Ang isa ka maayo nga puno wala nagapamunga sang higos kundi sang maayo man nga mga bunga. Kon ngaman nga gintuga kita sang Mahal nga Diyos, ini kay tungud nga luyag Niya nga ipa-ambit sa aton ang Iya nga paghigugma… paghigugma nga dapat ipa-ambit sa isa kag isa. Buot silingon ini nga sahi sang paghigugma nagapamunga sa aton pagkabuhi. Sa tagsa naton nga pagpa-ambit sini nga gugma, ginapahag naton ang kaayo sang aton Manunuga. Indi naton sarang matago ini nga paghiguma kay ang naturalesa sang paghigugma, dapat GINAPA-AMBIT! Suno sa hulubaton: “Love is not love, unless it is given away!”- (Indi sang minatuod ang gugma kon wala ini ginahatag!). Kon ginatago lamang naton ii sa aton kaugalingon, ini indi sang paghiguma nga minatuod kundi PAGKAMAIYA-IYAHON.
Ang aton Amay sa langit, nagapa-abut sini nga bunga sang paghigugma sa aton kabuhi. Siya padayon nga nagapadala sa aton tunga sang mga tawo kag mga instrumento sa pagpahanumdum sa aton nga Siya isa ka Amay nga mahigugma-on kag kita, bilang Iya mga anak, may katungdanan sa pagpa-ambit sang Iya nga gugma sa isa kag isa.
Mayad kita magbaton sang regalo sang paghigugma, apang maalwan man bala kita sa pagpa-ambit sini nga gugma ilabi na gid sa mga mabudlay nga higugma-on?... Ang aton kaaway… ang mga nagsakit sang aton balatyagon? Nagpamunga bala kita sang maayo?